बेनी, म्याग्दीको उत्तरी क्षेत्र हुदै पर्यटकीय जिल्ला मुस्ताङलाई राष्ट्रिय राजमार्गसँग जोड्ने बेनी–जोमसोम सडक आइतबार बिहानदेखि अवरुद्ध भएको छ ।
म्याग्दीको अन्नपूर्ण र मुस्ताङको थासाङ गाउँपालिकाको सिमानामा रहेको घोप्टेभिरमा खसेको सुख्खा पहिरोका कारण सडक अवरुद्ध भएको जिल्ला प्रहरी कार्यालय मुस्ताङले जनाएको छ ।
बिहान करिब सात बजे पहिरो खसेपछि अवरुद्ध बनेको सडक खुलाउन सडक विभागको डोजर परिचालन भएको सिमा प्रहरी चौकी घाँसाका प्रमुख प्रहरी सहायक निरिक्षक तेजबहादुर कुमालले बताउनुभयो ।
सडक अवरुद्ध हुँदा मुस्ताङ जिल्लाको सिधा यातायात सम्पर्क टुटेको छ । प्रतिकुल मौसमका कारण पोखरा–जोमसोम हवाई सेवा बन्द छ । स्थानीयबासीका साथै मुस्ताङ घुम्न जाने र फर्कने पर्यटकहरु प्रभावित भएका छन् ।
मुस्ताङ तर्फ जानेहरु म्याग्दीको काभ्रे र मुस्ताङ हुदै म्याग्दीतर्फ आउनेहरु घाँसामा रोकिएका छन् ।
