बेनी, म्याग्दीको बेनी नगरपालिका–९ मा रहेको धार्मिक स्थल गलेश्वर मन्दिरमा एक वर्षमा रु. ७३ लाख भन्दा बढी भेटि संकलन भएको छ ।
आर्थिक वर्ष २०८१÷८२ मा गलेश्वरमा पुजाआजा र दर्शनका लागि आएका भक्तजनहरुले रु. ७३ लाख १५ हजार नौ सय २७ भेटि चढाएका गलेश्वर शिवालय क्षेत्र विकास कोषले जनाएको छ । कोषका अध्यक्ष माधवप्रसाद रेग्मीले भक्तजनको आगमनसँगै भेटि पनि बढेको बताउनुभयो ।
उहाँका अनुसार आर्थिक वर्ष २०८०÷०८१ मा कुल रु. ५८ लाख ४० हजार पाँच सय १० भेटी संकलन भएको थियो । ०८१÷०८२ मा नियमित रु. ४७ लाख १० हजार दुई सय ९० र मेलापर्वमा रु. २६ लाख पाँच हजार छ सय ३७ भेटि संकलन भएको कोषका कार्यालय सचिव राम बानियाले जानकारी दिनुभयो ।
भेटि सहित विभिन्न शिर्षकमा बैंक ब्याज बाहेक गत वर्षमा रु. ९४ लाख १५ हजार १७ आम्दानी भएको उहाँले बताउनुभयो । यज्ञ दर्ताबाट रु. चार लाख ७३ हजार पाँच सय २७, यात्री निवास भाडा रु. सात लाख १९ हजार सात सय १४, सहयोग रु. तीन लाख ५९ हजार ७९ र स्टल भाडा वापत रु. पाँच लाख ४६ हजार सात सय ७० आम्दानी भएको छ ।
गलेश्वर मन्दिर परिसरमा कोषले सञ्चालन गरेको धर्मशालामा एक वर्षको अवधीमा १० हजार जना तिर्थयात्रीहरुले सहुलियतमा आवास सुविधा पाएका छन् । मन्दिरको आम्दानी कार्यालय, पुजा व्यवस्थापन, मन्दिरका पुुजारी, जेष्ठ नागरिक आश्रमका भान्सेको तलबका साथै संस्कृति विद्यालय सञ्चालनमा परिचालन गरिएको कोषले जनाएको छ ।
गलेश्वरमा भक्तजनले चढाउने भेटी मेलाको भोलिपल्टै र अन्य समयमा मासिकरुपमा गणना गरेर सार्वजनिक गर्ने प्रचलन छ । मन्दिरको आम्दानीबाट गत वर्ष जेष्ठ नागरिक आश्रममा रु. १५ लाख खर्चेर सभाहल निर्माण, गलेश्वर बजार सौन्दर्यकरण योजनामा बेनी नगरपालिकासँग साझेदारीमा रु. छ लाख, घतान स्वास्थ्य चौकीमा स्तनपान कक्ष बनाउन रु. एक लाख सहयोग गरिएको अध्यक्ष रेग्मीले बताउनुभयो ।
कालीगण्डकी नदी किनारको ९ रोपनी क्षेत्रफलमा फैलिएको चट्टानमाथी अवस्थित गलेश्वर शिवालय क्षेत्र हिन्दु तथा वौद्ध धर्मावलम्बिहरुको साझा तिर्थस्थल मुक्तिनाथको प्रवेशद्धार मानिन्छ ।
हिन्दुधर्म ग्रन्थमा सतिदेबीको गला पतन भएर गलेश्वर नाम रहन गएको उल्लेख गरिएको यस मन्दिरमा साउन महिनाको सोमबार, बालाचर्तुदशी र शिवरात्री पर्बमा बिशेष मेला लाग्ने छ । दैनिक नित्य पुजाआजा हुने गर्छ । गलेश्वर दर्शन र पुजाआजा गरेमा मनोकाक्षा हुुने धार्मिक विश्वास छ ।
