बेनी, धवलागिरी गाउँपालिका–४ बाँसबोटको भिरबाट खसेको पहिरोले बुधबार दिउँसो आंशिक रुपमा थुनिएको म्याग्दी नदी करिब एक घण्टापछि बग्न थालेको छ ।
धवलागिरी गाउँपालिका –४ र ७ को सिमाना भएर बग्ने म्याग्दी नदीमा भिरबाट खसेको पहिरो थुप्रिदा नदीको नियमित प्रवाह रोकिएको र तलाउ बनेको थियो । ठुला दुङ्गा सहित पहिरोले बनाएको बाँध नाघेर नदी बग्न र तलाउमा पानीको सतह घट्न थालेको धवलागिरी गाउँपालिकाका उपाध्यक्ष रेशम पुनमगरले बताउनुभयो ।
दिउँसो १२ः३० देखि करिब एक घण्टा सम्म पहिरोका कारण तल्लो क्षेत्रमा पानीको सतह घटेको थियो । घटनास्थलमा पुगेका बासबोटको छिमेकी छहरीका बासिन्दा तम पुनले थुनिएको नदी बग्न थालेपनि भिरबाट पहिरो खस्ने क्रम भने नरोकिएको बताउनुभयो ।
करिब तीन सय मिटर लामो र ३० मिटर गहिरो तलाउ बनेको उहाँले बताउनुभयो । करिब बुधबार बिहान म्याग्दीको धवलागिरी र मालिका गाउँपालिकामा भारी बर्षा भएको थियो ।
छहरी, कल्लेनी, बगर, भारवाङ, साँवता, थापाचौर, दरवाङ, छिसवाङ, खोप्टी, पिपलबोट, बाबियाचौर, तोराखेत, सिमलचौर, तातोपानी, सिंगा र बेनी बजार म्याग्दी नदीको तटीय क्षेत्रका बस्तिहरु हुन् ।
धवलागिरी हिमालमा मुहान भएको म्याग्दी नदी बेनी बजारमा आएर कालीगण्डकीमा मिसिन्छ । प्रमुख जिल्ला अधिकारी गुरुदत्त ढकालले तत्काललाई जोखिम टरेपनि तटीय क्षेत्रका बासिन्दाहरुलाई खोला किनारमा नजान र सकर्त रहन अनुरोध गर्नुभएको छ ।
धवलागिरी गाउँपालिकाका अध्यक्ष प्रेमप्रसाद पुनले पहिरो खसेको भिरको फेदीमा रहेको बाँसबोटका बासिन्दालाई सुरक्षित ठाउँमा सार्ने तयारी गरेको बताउनुभयो । बाँसबोटमा पाँच घरपरिवारको बसोबास छ । पहिरोका कारण धवलागिरी गाउँपालिका–४ खिवाङ, बगर र नाउरा जोड्ने सडक अवरुद्ध बनेको छ ।
सडक अवरुद्ध हुँदा स्थानीयबासीका साथै ५३ दशमलब पाँच मेगावाट क्षमताको अपर म्याग्दी १ र ३७ मेगावाट क्षमताको अपर म्याग्दीखोला जलविद्युत आयोजना निर्माण कार्य प्रभावित बनेको छ ।
