बेनी, म्याग्दीको मालिका गाउँपालिका–७ बिममा रहेको बेल्फी लुरवाङ सिचाई योजनाको ३७ वर्षपछि पक्की नहर निर्माण भएको छ ।
वि.स. २०४५ मा निर्माण भएको कच्ची नहर पक्की भएपछि योजनाबाट लुरवाङमा रहेको एक सय ५० घरधुरी किसानको करिब तीन सय रोपनी जमिनमा सिचाई सुविधा पुगेको उपभोक्ता समितिले जनाएको छ । गण्डकी प्रदेश सरकारको बजेटबाट खानेपानी, जलस्रोत तथा सिचाई डिभिजन कार्यालय म्याग्दीको सहयोगमा उपभोक्ता समितिले योजना निर्माण गरेको हो ।
नहरमा पानी चलाएपछि लुरवाङको फाँटमा धान रोपाइका लागि यसपाली आकाशे पानी कुर्न नपरेको स्थानीय किसान वुद्धि जुग्जालीले बताउनुभयो । कच्चि नहरमा पानी सोसिने र भिरमा पाइप राख्दा डढेलोले नष्ट गर्ने समस्या थियो ।
उपभोक्ता समितिका अध्यक्ष झकबिर जुग्जालीले पक्की नहर निर्माण भएपछि बेल्फिको मुहानबाट लुुरवाङको फाँटमा सिचाईका लागि पानी ल्याउन हरेक वर्ष पाइप फेर्नुपर्ने झञ्जटबाट मुक्ति मिलेको बताउनुभयो ।
“यसपाली पक्की नहर निर्माण भएपछि हरेक वर्ष पाइप फेर्नुपर्ने समस्या हटेको छ,” उहाँले भन्नुभयो “पाइप परिवर्तन गर्दा हुने खर्च पनि बचत भएको छ ।” चालु आर्थिक वर्षमा रु. २० लाख बजेट बिनियोजन भएको योजना मार्फत गलघण्टीको भिर र लुरवाङमा तीन सय मिटर पक्की नहर निर्माण भएको छ ।
एक सय ७० मिटर एक सय २५ मिलिलिटर क्षमताको पाइपलाइन जडान गरिएको उपभोक्ता समितिका सचिव टुकमान जुग्जालीले बताउनुभयो । गलघण्टीको जोखिमयुुक्त अक्करे भिरमा सावधानी अपनाएर करिब एक सय मिटर पक्की नहर निर्माण गरिएको उहाँले बताउनुभयो । गत वर्ष बिनियोजन भएको रु. १० लाख बजेटबाट बेल्फिमा इन्टेक, बाँध र करिब दुई सय मिटर पाइपलाइन जडान भएको थियो ।
आगामी वर्षका लागि बिनियोजन भएको रु. १० लाख बजेटबाट लुरवाङमा एक वटा ‘क्रसिङ’ र थप नहर बनाएर आयोजना सम्पन्न गर्ने लक्ष्य राखिएको छ । लुरवाङमा धान लगायत खाद्यबालीका साथै सुुन्तला र व्यवसायिक तरकारी खेती गर्न सहज भएको छ । बिम गाउँको फेदीमा रहेको लुरवाङलाई स्थानीयबासीले अन्नको भण्डार मान्ने गर्छन् ।
