बेनी । म्याग्दीका तीन जना पत्रकारहरुलाई मङगलवार जनही रु. ११÷११ हजार सहित ‘विकास पत्रकारिता पुरस्कार’ वितरण गरिएको छ ।
जिल्ला समन्वय समिति, म्याग्दीको १० औ जिल्ला सभाको अवसरमा म्याग्दी प्रेसका दलप्रसाद विश्वकर्मा (अमित), नेपाल टेलिभिजनका प्रताप बानिया र रिखार दैनिक तथा गण्डकीपत्र डटकमका राकेश शर्मालाई पुरस्कृत गरिएको हो ।
संविधानसभा सदस्य गोविन्द पौडेल, नवराज शर्मा, नरदेवी पुन, रेशमबहादुर बानिया र कार्यबहाक जिल्ला समन्वय समितिका प्रमुख डिलकुमारी खत्रीले नगद, प्रशंसापत्र वितरणका साथै ढोसल्ला ओढाएर सम्मान गर्नुभएको थियो ।
तत्कालीन जिल्ला विकास समितिले स्थापना गरेको रु. तीन लाख राशीको विकास पत्रकारिता अक्षयकोषको ब्याजबाट हरेक बर्ष म्याग्दीमा एक जना पत्रकारलाई पुरस्कृत गर्दै आएको छ । आर्थिक वर्ष २०७८÷०७९ देखि २०८०÷०८१ सम्मको पुरस्कार विश्वकर्मा, बानिया र शर्मालाई प्रदान गरिएको हो ।
यसैगरी प्राकृतिक स्रोत वित्त आयोगको मूल्याङ्कनमा जिल्लामा उत्कृष्ट भएको बेनी नगरपालिकाका प्रमुख सुरत केसी र उपप्रमुख ज्योती लामिछाने तथा स्थानीय तह वित्तीय जोखिम मुल्याङ्कनमा म्याग्दीका अन्य स्थानीय तह भन्दा बढी अंक प्राप्त गरेको अन्नपूर्ण गाउँपालिकाका उपाध्यक्ष दिवा तिलिजा पुन र प्रमुख प्रशासकीय अधिकृत रामप्रसाद कडेललाई सम्मान गरिएको थियो ।
दुई दिनसम्म सञ्चालन हुने सभाको उद्घाटन कार्यक्रममा बत्ताहरुले म्याग्दीमा विकासका मुद्दामा राजनीतिक दलहरुको एकता रहेको, अधुरा र अलपत्र योजनालाई पूर्णता दिने तथा आवश्वयकताका आधारमा योजना र बजेट व्यवस्थापन गर्न तीन तहका सारकारले सक्रीय भूमिका आवश्यक रहेको बताउनुभयो ।
कार्यक्रममा म्याग्दीमा रहेका संघीय, प्रदेश सरकारका कार्यालय र स्थानीय तहहरुको चालु आर्थिक वर्षको योजना तथा कार्यक्रम कार्यान्वयनको विषयमा समिक्षा गरिएको जिल्ला समन्वय समितिका शाखा अधिकृत अमृत सुवेदीले बताउनुभयो ।
