बेनी, ः बेनीमा बुधबार सम्पन्न निःशुल्क मुटु परीक्षण तथा उपचार शिविरबाट एक हजार एक सय जना लाभान्वित भएका छन् ।
जिल्ला समन्वय समिति म्याग्दीसहित जिल्लाका छ वटै स्थानीय तहको संयुक्त आयोजना र शहीद गङ्गालाल राष्ट्रिय हृदय रोग केन्द्र काठमाडौँको प्राविधि सहयोगमा दुई दिनसम्म शिविर सञ्चालन भएको थियो ।
म्याग्दी बहुमुखी क्याम्पसमा सञ्चालन भएको शिविरमा एक हजार एक सय १५ जनाले सेवा लिएका जिल्ला समन्वय समिति म्याग्दीका शाखा अधिकृत अमृत सुवेदीले जानकारी दिनुभयो । उहाँका अनुसार शिविरमा पहिचान भएका १३ लाई सहिद गंगालाई राष्ट्रिय हृदय रोग उपचार केन्द्रमा सिफारिस गरिएको छ । उनिहरुलाई जयन्ति स्मृति प्रतिष्ठानले यातायातको ब्यवस्था गर्ने भएको छ । नौ जना जन्मजात मुटुरोगी भेटिएका छन् ।
शिविरबाट म्याग्दी र पर्वतको जलजला गाउँपालिकाका सर्वसाधारणले सेवा लिएका छन् । मुटुरोग विशेषज्ञ चिकित्सकले मुटुको परीक्षण तथा परार्मश, सुगर, इसिजी, ईको तथा रगत परिक्षण सम्बन्धी सेवा दिनुभएको थियो । डा. रबी मल्लको नेतृत्वमा १० जना भन्दा बढी चिकित्सकको टोलीले सेवा दिनुभएको थियो ।
मुटुरोगको समस्या न्युनीकरण गर्न जनचेतना फैलाउने र बिरामीको पहिचान गरि उपचारको पहुँचमा ल्याउने उद्देश्यले शिविर आयोजना गरिएको जिल्ला समन्वय समिति म्याग्दीका कार्यवाहक प्रमुख डिलकुमारी खत्रीले बताउनुभयो । शिविरका साथै छ वटै स्थानीय तहका एक सय ५२ जना स्वास्थ्यकर्मी, जनप्रतिनिधी, सुरक्षाकर्मी र कर्मचारीहरुलाई प्राथमिक उपचार सम्बन्धी तालिम पनि प्रदान गरिएको छ ।
प्रदेश अस्पताल बेनी, बेनी नगरपालिकाले स्वाथ्यकर्मी, म्याग्दी उद्योग वाणिज्य सङ्घ, राखु कल्याणकारी समाज, म्याग्दी जेसीज, नेपाल रेडक्रस सोसाईटी, ओमकुमारी शान्ति कोष र म्याग्दी बहुमुखी क्याम्पसले स्वंयमसेवक परिचालन गरेका थिए ।
