बेनी, म्याग्दीको धवलागिरी गाउँपालिका–५ मलम्पार र वडा नं.–६ को बुल गाउँमा मंगलबार केन्द्रिय प्रशारण लाइनको बिद्युत सुविधा पुगेको छ ।
नेपाल विद्युत प्राधिकरणले सञ्चालन गरेको उज्यालो म्याग्दी कार्यक्रम अन्तर्गत मलम्पार र बुलमा विद्युत सुविधा विस्तार गरिएको हो । मलम्पारमा एक सय ५० र बुलमा ४५ घरपरिवारको बसोबास छ ।
धवलागिरी गाउँपालिका–६ का वडा अध्यक्ष राजाराम सुवेदीले मराङ–राम्चे हुदै बुल र मलम्पारमा पु¥याइएको विद्युत लाइनको परिक्षण सफल भएको जानकारी दिनुभयो । “बुलमा रहेको ट्रान्सफर्मरसम्म विद्युत आपुर्ति गरेर चार्ज गरिएको छ,” उहाँले भन्नुभयो “मिटरबक्स जडान गरेपछि उपभोक्ताको घरघरमा पनि बिद्युत वितरण हुन्छ ।”
मलम्पार र बुलका बासिन्दाले उज्यालोका लागि हाल लघुजलविद्युत परियोजना, सौर्य उर्जा र टुकीमा निर्भर छन् । म्याग्दीका १४ स्थानका दुई हजार एक ८३ घरधुरीमा राष्ट्रिय प्रशारण लाइनको विद्युत सुविधा विस्तारका लागि गण्डकी प्रदेशसभा सदस्य तथा पुर्वमन्त्री रेशमबहादुर जुग्जाली र प्रदेश सांसद हरिबहादुर भण्डारीको अगुवाईमा प्राधिकरणले आर्थिक वर्ष २०८०÷०८१ देखि रु. २२ करोड बजेटको योजना सञ्चालन गरेको छ ।
यस योजना मार्फत यसअघि मालिका गाउँपालिका–१ निस्कोट, २ रुम, ३ डाडागाउँ, पात्ले, वडा नं.–४ ओखरबोटका छ सय घरपरिवारमा विद्युतीकरण भइसकेको छ । मालिका गाउँपालिकाको चिउरीबोट, महभिर, धवलागिरी गाउँपालिकाको लुलाङ र मल्कवाङमा विद्युतीकरणको काम अन्तिम चरणमा पुगेको नेपाल विद्युत प्राधिकरण बेनी वितरण केन्द्रका प्रमुख सत्यनारायण गामीले बताउनुभयो । विद्युत विस्तार योजनाको ठेक्का न्यु ढुंगाना निर्माण सेवाले पाएको छ ।
