बेनी, बेनीमा मंगलबारदेखि निःशुल्क मुटु परीक्षण तथा उपचार शिविर सुरु भएको छ ।
जिल्ला समन्वय समिति म्याग्दीसहित जिल्लाका ६ वटै स्थानीय तहको संयुक्त आयोजना र शहीद गङ्गालाल राष्ट्रिय हृदय रोग केन्द्र काठमाडौँको प्राविधि सहयोगमा सुरु भएको शिविर दुई दिनसम्म सञ्चालन हुनेछ् ।
म्याग्दी बहुमुखी क्याम्पसमा सञ्चालन भएको शिविरमा म्याग्दी र पर्वतको जलजला गाउँपालिकाका मुटु रोगीहरू लाभान्वित हुने अपेक्षा गरिएको छ । शिविरमा मुटुरोगसम्बन्धी विशेषज्ञ सेवा प्रदान गरिने जिल्ला समन्वय समितिका कार्यबाहक प्रमुख डिलकुमारी खत्रीले जानकारी दिनुभयो ।
मुटुरोगको समस्या न्युनीकरण गर्न जनचेतना फैलाउने र बिरामीको पहिचान गरि उपचारको पहुँचमा ल्याउने उद्देश्यले शिविर आयोजना गरिएको उहाँले बताउनुभयो । मुटुरोग विशेषज्ञबाट मुटुको परीक्षण तथा परार्मश, सुगर, इसिजी, ईको तथा रगत परिक्षण सम्बन्धी सेवा उपलब्ध रहेको छ ।
शहीद गङ्गालाल राष्ट्रिय हृदय रोग केन्द्र काठमाडौँका निर्देशक डा. रबी मल्लको नेतृत्वमा रहेका १० जना भन्दा बढी चिकित्सकको टोलीले सेवा दिएका छन् । पहिलो दिन पाँच सय ६५ जना सर्वसाधारणले सेवा लिएका जिल्ला समन्वय समितिका शाखा अधिकृत अमृत सुवेदीले बताउनुभयो ।
शिविरका साथै छ वटै स्थानीय तहका ८७ जना स्वास्थ्यकर्मी, जनप्रतिनिधी, सुरक्षाकर्मी र कर्मचारीहरुलाई प्राथमिक उपचार सम्बन्धी तालिम पनि प्रदान गरिएको छ । प्रदेश अस्पताल बेनीले शिविरलाई सफल पार्न स्वाथ्यकर्मीहरू परिचालन गरेको छ ।
म्याग्दी उद्योग वाणिज्य सङ्घ, राखु कल्याणकारी समाज, म्याग्दी जेसीज, नेपाल रेडक्रस सोसाईटी, ओमकुमारी शान्ति कोष र म्याग्दी बहुमुखी क्याम्पसले स्वंयमसेवक परिचालन गरेका छन् ।
म्याग्दी उद्योग वाणिज्य सङ्घ, राखु कल्याणकारी समाज, म्याग्दी जेसीज, नेपाल रेडक्रस सोसाईटी, ओमकुमारी शान्ति कोष र म्याग्दी बहुमुखी क्याम्पसले स्वंयमसेवक परिचालन गरेका छन् ।
