बेनी ः म्याग्दीको अन्नपूर्ण गाउँपालिका–१ सेकार्कु स्थित तातोपानी कुण्डलाई ब्यवस्थित बनाउन पूर्वाधार निर्माण थालिएको छ ।
पहाडको फेद र कालीगण्डकी नदीको किनारमा रहेको मुहानबाट निस्कने पानीलाई पोखरीमा सङकलन गरेर स्नानको ब्यवस्था मिलाउने र पर्यटक भित्र्याउने उद्देश्यले अन्नपूर्ण गाउँपालिकाले रु. एक करोड १७ लाखको लागतमा पूर्वाधार निर्माण थालेको हो ।
अन्नपूर्ण गाउँपालिका–१ का वडा अध्यक्ष दिलिप गर्बुजाले तातोपानी पानी संकलन गर्ने पोखरी, आश्रयस्थल, सार्वजनिक शौचालय, कपडा फेर्न कोठा, टिकट काउन्टर र रेष्टुरेन्टका लागि आवश्यक पूर्वाधार तयार पार्न लागिएको जानकारी दिनुभयो ।
“कालीगण्डकी किनारको तातोपानी व्यवस्थित नहुँदा हाल हिउँद याममा मात्र खुल्ला ठाउँमा स्नान गर्न सकिन्छ,” उहाँले भन्नुभयो “बेनी–जोमसोम सडकको नजिकै निर्माण हुन लागेको पोखरी सञ्चालन गरेर आम्दानीको स्रोत बनाउने लक्ष्य छ ।”
सेकार्कुमा ५० डिग्री सेल्सियस प्राकृतिक तातोपानी निस्कने मुहान रहेको छ । तातोपानी सङकलन गरिएको पोखरीमा स्नान गरेमा शारिरिक स्फुर्तीका साथै चोटपटक लागेको, चिसोका कारण हुने स्वास्थ्य समस्या निको हुने जनविश्वास छ ।
मुहान देखि छ सय मिटर तल दुई ईञ्चको युपिभिसी पाइपबाट ल्याइने तातोपानी सङकलन गरेर स्नानका लागि ११ दशमलब २५ मिटर लम्बाई र आठ मिटर चौडाई भएको पोखरी निर्माणको काम अन्तिम चरणमा पुगेको छ ।
संघीय सरकारको विशेष अनुदानमा सेकार्कु तातोपानी कुण्डमा पूर्वाधार निर्माणका लागि २०८१ असार ३ गते कालीगण्डकी निर्माण सेवा प्रा.ली.सँग रु. एक करोड १७ लाख ६० हजार छ सय ८५ मा ठेक्का सम्झौता भएको थियो ।
वि.स. २०८२ जेठ ३० गतेसम्म म्याद रहेको ठेक्का मार्फत पोखरी र परिसरमा भौतिक संरचना निर्माण गर्ने काम ७० प्रतिशत सकिएको अन्नपूर्ण गाउँपालिकाका सवईञ्जिनियर करिम मुल्लाह मियाले बताउनुभयो ।
ठेकेदारले तातोपानी संकलनका लागि मुहानमा तीन वटा इन्टेक र पाइपलाइन जडानको तयारी गरेको छ । तातोपानीको मुहानसम्म पुग्ने सडक बनाउन धेरै खर्च लाग्ने र बर्खामा बाढीले असर पु¥याउने भएकाले केही तल संरचना बनाउन लागिएको हो ।
बेनी–जोमसोम सडकको तिप्ल्याङ–महभिर जोड्ने मोटरेबल पुल देखि पाँच सय मिटर नजिकै बनाउन लागिएको तातोपानी कुण्डले मुस्ताङ जाने आउने पर्यटकको बसाई लम्बाउन सहयोग पुग्ने अपेक्षा गरिएको छ ।
