मल्लाज । पर्वतको जलजला गाउँपालिकाले पालिकामा कार्यरत शिक्षकहरुको सहभागितामा स्थानीय पुस्तक तयार पार्ने काम थालेको छ ।
मल्लाजमा रहेको विद्याज्योती माविमा स्थानीय पुस्तक लेखनका लागि आइतबारदेखि कार्यशाला गोष्ठि शुरु भएको छ । वि.स. २०७९ मा कक्षा १–८ तहको पाठ्यक्र तयार भइसकेको छ । दुई वर्ष पाठ्यक्रमको आधारमा पठनपाठन गरिएको छ ।
हाम्रो जलजला नामको पुस्तक तयार पार्न स्रोत सामग्री संकलनका लागि कार्यशाला आयोजना गरिएको हो । पुस्तकको मस्यौदा तयार पार्न जनकल्याण मावि नाग्लीवाङका प्रअ कृष्णप्रसाद रेग्मीको संयोजकत्वमा समिति गठन भएको छ ।
संयोजक रेग्मीले विषयसँग शिक्षकहरु मर्फत संकलन हुने स्रोत सामग्रीको आधारमा पुस्तक तयार पारिने जानकारी दिनुभयो । पाँच देखि आठ जना शिक्षकहरुको १३ वटा समूह बनाएर फरक फरक विषयसँग सम्बन्धीत स्रोत सामग्री संकलन गर्न लागिएको हो ।
जलजला गाउँपालिकाका शिक्षा अधिकृत यज्ञप्रसाद लामिछानेले विद्यार्थीले बास्तविक क्षमता प्रर्दशन गर्न पाउने गरि पुस्तकको स्रोत सामग्री जुटाउन लागिएको बताउनुभयो । शिक्षकहरु मार्फत संकलन हुने स्रोत सामग्री भूगोल र स्थानीय समाज तथा परिवेश अनुकुल हुने अपेक्षा गरिएको छ ।
जलजला गाउँपालिकाका अध्यक्ष राजुप्रसाद आचार्यले बाहिरका विषयविज्ञ ल्याएर धेरै खर्च गर्नु भन्दा स्थानीय शिक्षकहरुलाईनै परिचालन गरेर पुस्तक तयार पार्दा मौलिक र मितब्ययी हुने बताउनुभयो । पुस्तकप्रति शिक्षकहरुको अपनत्व हुने र शिक्षक आफैले तयार पारेको पुस्तकलाई पठनपाठन गराउदा हुने सिकाई उपलब्धी पनि सुधार हुने अध्यक्ष आचार्यले बताउनुभयो ।
जलजला गाउँपालिकाको शिक्षा समितिका संयोजक एकिन्द्र खत्रीले शिक्षकहरुले सक्रीयताका साथ अग्रसर भएर पुस्तक तयार पार्न सन्दर्भ सामग्री जुटाउन लागेकामा खुसी ब्यक्त गर्नुभयो । स्रोत सामग्री संकलन र पुस्तकको मस्यौदा तयार पार्न दुई दिनको समय अपुग भएकाले समय थप गर्न शिक्षकहरुले माग गरेका छन् ।
