लामाखेत । पर्वतको जलजला गाउँपालिकामा वृद्धिमुखी उद्यमशिलता र रोजगारी प्रवर्धन कार्यक्रम लागू भएको छ ।
गण्डकी प्रदेश सरकारको उद्योग तथा पर्यटन मन्त्रालय र जलजला गाउँपालिकाको साझेदारीमा दायित्व संस्था मार्फत उद्यमीको पहिचान गरि उनिहरुको क्षमता विकास, ब्यवसायको स्तरोन्नति र बिक्री तथा बजारीकरणको लागि कार्यक्रम सञ्चालन भएको हो ।
दायित्व संस्थाका कार्यक्रम अधिकृत जुनतारा रानाले ४० जना उद्यमीहरुलाई न्युनतम रु. २५ हजार देखि एक लाख पचास हजारसम्म उद्यममा साझेदारी गरिने बताउनुभयो । “यस कार्यक्रमका लागि चालु आर्थिक वर्षमा प्रदेश सरकारले रु. ४० लाख र जलजला गाउँपालिकाबाट रु. २० लाख बिनियोजन भएको छ,” उहाँले भन्नुभयो “कृषि, पशुपालन, जडीवुटी, पर्यटन, सेवा र उत्पादनमा आधारित लघु, साना तथा मझौला उद्यमीहरुलाई परियोजनाको कुल लागतमा ५० प्रतिशत साझेदारी गर्छौ ।”
पहिलो चरणमा वैशाख ३ गतेसम्म कार्यक्रममा आवद्ध हुन इच्छुक उद्यमीहरुबाट आवेदन संकलन गरिने भएको छ । तोकिएको मापदण्ड अनुसार पहिलो चरणमा ४० जना उद्यमी चयन गर्ने, २० जनालाई रु. २५ हजार सम्म उद्यम विकास प्रविधि पुरक साझेदारी, १० जनालाई रु. एक लाख सम्म नवप्रर्वद्धन पुरक साझेदारी, तेस्रो चरणमा नौ जनालाई रु. असी हजार र एक जनालाई रु. एक लाख पचास हजार बिक्री तथा बजारीकरण प्रविधि पुरक साझेदारी गरिने जलजला गाउँपालिकाको उद्यम अधिकृत भगवती पुनले बताउनुभयो ।
कार्यक्रम कार्यान्वयनको विषयमा आइतबार गाउँपालिकाको कार्यालय लामाखेतमा जनप्रतिनिधी र उद्यमीहरुबीच छलफल भएको थियो । कार्यक्रममा जलजला गाउँपालिकाका अध्यक्ष राजुप्रसाद आचार्यले उद्यमीहरुको पहिचान र उनिहरुको क्षमता विकास गरि उत्पादन वृद्धि गराई बजारीकरणका लागि कार्यक्रमलाई प्रभावकारी रुपमा कार्यान्वयन गर्नुपर्ने बताउनुभयो ।
कार्यसम्पादन मूल्याङ्कन र गाउँपालिकाको सम्भावना तथा क्षमताको आधारमा प्रदेश सरकारले गण्डकी प्रदेशमा जलजलासँगै नवलपुरको हुप्सेकोट, बागलुङको बडीगाड, गोरखाको गोरखा नगरपालिका, सिरानचोक गाउँपालिका र तनहुँको म्याग्दे गाउँपालिकामा यो कार्यक्रम लागू गरेको अध्यक्ष आचार्यले बताउनुभयो ।
गाउँपालिकाका उपाध्यक्ष दिपक आचार्यले लघुउद्यम शाखा र वडाका कार्यक्रमबाट तयार भएका उद्यमीहरुलाई सघाउन यो कार्यक्रम प्रभावकारी हुने अपेक्षा गर्नुभयो । जलजला–४ का वडा अध्यक्ष भरत क्षेत्रीले कार्यक्रम सफल पार्न उद्यमीहरुले चासो देखाउनुपर्ने बताउनुभयो ।
नेपाल इनभेष्टमेन्ट मेगा बैंक को जलजला शाखाका कर्जा अधिकृत दिनेश रेग्मीले सबै प्रक्रीया पुरा गरेर आउने उद्यमीहरुलाई बैंकले कर्जा उपलब्ध गराउने बताउनुभयो । उद्यमी रिता दर्जीले सुरु गरेको उद्यमलाई सफल बनाउन कार्यक्रमबाट सहयोगको अपेक्षा गर्नुभयो ।
