बेनी, म्याग्दीको धवलागिरी गाउँपालिका–१ गुर्जामा रहेको पर्यटकीय स्थल तास्ना धुरी जोड्ने पदमार्ग निर्माण थालिएको छ । गुर्जा आउने पर्यटकको बसाई लम्बाउन तास्ना धुरीलाई सहायक गन्तब्यको रुपमा विकास गर्नका लागि पदमार्ग निर्माण थालिएको हो ।
धवलागिरी गाउँपालिका–१ गुर्जाका वडा सदस्य गुनराम छन्त्यालले प्रधानमन्त्री रोजगार कार्यक्रम मार्फत चालू आर्थिक वर्षमा गाउँपालिकाले बिनियोजन गरेको रु. १० लाख बजेटबाट पदमार्ग निर्माण थालिएको बताउनुभयो ।
२० जना बेरोजगार युवा युवतिहरु परिचालन गरेर पदमार्ग निर्माण भइरहेको छ । गोठला र स्थानीयबासीले घाँस, दाउरा गर्न तास्ना धुरी जान आउन प्रयोग गरेको परम्परागत बाटोलाई स्तरोन्नति गरेर पदमार्ग बनाउन लागिएको हो । माटो काट्ने र ढुंगाको सिढी चिनेर पदमार्ग बनाउन लागिएको उपभोक्ता समितिका अध्यक्ष तुलसी छन्त्यालले बताउनुभयो ।
समुन्द्रि सतहदेखि दुई हजार सात सय मिटर उचाईमा रहेको गुर्जामा अल्पसंख्यक छन्त्याल र दलित समुदायका मात्र दुई सय ५० घरपरिवारको बसोबास छ । गुर्जा देखि एक घण्टा ३० मिनेट उकालोमा पैदलयात्रा गरेपछि तास्ना धुरी पुगिन्छ ।
धवलागिरी गाउँपालिका–१ का वडा अध्यक्ष झकबहादुर छन्त्यालले समुन्द्रि सतहदेखि तीन हजार दुई सय मिटर उचाईमा रहेको तास्ना धुरीबाट गुर्जा, धौलागिरि र अन्नपूर्ण हिमाललाई नजिकैबाट नियाल्न सकिने बताउनुभयो ।
“छन्त्याल संस्कृति, रहनसहन र जिवनशैलीमा रमाउन गुर्जा आउने पर्यटकको बसाई लम्बाउन हिमाल, यार्सागुम्बा पाइने बुकी पाटन र सुर्योदय अवलोकन गर्न सकिने तास्नाधुरीलाई सहायक गन्तब्यको रुपमा विकास गर्न लागिएको हो,” उहाँले भन्नुभयो “पहाडको फेदीमा रहेको गुर्जाबाट डाडाले छेक्ने भएकाले हिमाल देखिदैन । दृष्यअवलोकनका लागि पर्यटकलाई तास्ना उकाल्न सकेमा बसाई लम्बाउन सकिन्छ ।”
गुजमुज्ज परेका परम्परागत शैलीका घर, मौलिक संस्कृति अनि सोझा, सरल र मिजासिला छन्त्यालको बस्ती भएको म्याग्दीको दुर्गम बस्ती हो गुर्जा । ‘टुप्पीदेखि माथि ठाउँ छैन, गुर्जादेखि माथि गाउँ छैन’ भन्ने उखानबाट परिचित यो छन्त्याल जातिको ठूलो बस्ती हो । यो छन्त्याल जीवन, सभ्यता र संस्कृति हेर्ने सानो आँखी झ्याल हो ।
विचित्रका हिमाली र पहाडी धरातल, वनस्पति र सामाजिक संस्कृतिले भरिपूर्ण गुर्जा गाउँमा अझै पनि प्राचीन समाजका अवशेष भेट्न पाइन्छ । बिखला, चिराइतो, सतुवा, जटामसी, कुट्की, वनलसुनलगायतका जडीबुटी र दुर्लभ मानिएको कार्ज स्टोन (सेतो ढुङ्गो) को खानी रहेको गुर्जा गाउँको प्राकृतिक सुन्दरता, जैविक विविधता, सामाजिक मूल्यमान्यता र पर्यावरणीय शुद्धता पर्यटकका आकर्षण हुन् । गुर्जादेखि ढोरपाटन, गुर्जा, पुथा, चुरेन हिमालको आधार, डोल्पा र पुर्वी रुकुम जान सकिन्छ ।
