बेनी, भारत र चिनलाई जोड्ने राष्ट्रिय गौरवको कालीगण्डकी करिडोरको बेनी–जोमसोम–कोरला सडक अन्तर्गत म्याग्दीको भुरुङ्ग–तातोपानी देखि दाना हुदै घाँसा खण्डमा नौ किलोमिटर दुरीमा कालोपत्र गर्ने काम सकिएको छ ।
बेनी–जोमसोम–कोरला सडक आयोजना मार्फत आर्थिक वर्ष २०७३÷७४ मा शुरु भएको सडक स्तरोन्नतिको काम आठ वर्षपछि सम्पन्न हुने चरणमा पुगेको हो । प्रतिकुल भूगोल, कोरोना महामारी, बाढी पहिरो, नदिजन्य निर्माण सामग्री र निर्माण ब्यवसायीको समस्याका कारण लक्ष्य भन्दा पाँच वर्ष ढिलागरि सम्पन्न हुन लागेको म्याग्दीको अन्नपूर्ण गाउँपालिका–३ का वडा अध्यक्ष रमेश पुर्जाले बताउनुभयो ।
“म्याग्दीको अन्नपूर्ण गाउँपालिका–२ तातोपानी स्थित नागढुङ्गा देखि मुस्ताङको थासाङ गाउँपालिका–४ घाँसाको कैह्कुखोलासम्म पहिरो र कटानको जोखिम भएको बाहेकका ठाउँमा ढलान र कालोपत्र गर्ने कामले गति लिएको छ,” उहाँले भन्नुभयो “सडक स्तरोन्नति भएपछि यात्रा सहज, दुर्घटनाको जोखिम न्युनीकरण र यात्राअवधी छोटिएको छ ।”
वि.स. २०६४ मा मार्ग खुलेको यो सडकलाई ११ मिटर फराकिलो बनाएर कुना र डिलतर्फ टेवा पर्खाल, नाली निर्माण, ग्रेड तथा मोड सुधार गरिएको छ । वि.स. २०७४ मा शर्मा–गजुरमुखी जेभीले नागढुङ्गा–कैकुखोला खण्डको १६ दशमलब पाँच किलोमिटर सडक कालोपत्र सहित स्तरोन्नति गर्न ठेक्का रु. ६३ करोडमा ठेक्का सम्झौता गरेको थियो ।
ठेकेदार कम्पनीका आयोजना ब्यवस्थापक नरेन्द्र न्यौपानेले जलथले, सुकेबगर, दाना, तितर, काभ्रे र घाँसा खण्डमा नौ किलोमिटर डिबिएसडी प्रबिधिको कालोपत्रका साथै बादरजुङ, घोप्टे र काभ्रेभिर क्षेत्रमा तीन किलोमिटर ढलान गरिएको जानकारी दिनुभयो । “कालोपत्र र ढलान भएको सडकको डिलतर्फ बार लगाउने, रङ्गरोगन गर्ने काम भइरहेको छ,” उहाँले भन्नुभयो “पहिरो र कटानको जोखिम रहेको तीन किलोमिटरलाई छोडेर बाँकी ठाउँमा स्तरोन्नति गर्ने काम ९५ प्रतिशत सकिएको छ ।”
स्तरोन्नति भएपछि बेनी–जोमसोम सडकको सबैभन्दा जोखिमयुक्त तातोपानी–घाँसा खण्डको यात्राअवधी एक घण्टा ३० मिनेटबाट ३० मिनेटमा छोटिएको सवारी चालक सुदिप खड्काले बताउनुभयो । हिलो, धुलो र खाल्डाखुल्डीले यात्रु तथा स्थानीयबासीलाई सास्तीका साथै दुर्घटनाको जोखिम बढेको थियो ।
पर्वतको मालढुुङ्गा देखि म्याग्दी हुदै मुुस्ताङ स्थित चीनको सिमाना कोरला नाका जोड्ने दुई सय दुई किलोमिटर दुुरिको सडक दुुई लेनको कालोपत्र र ग्राभेल बनाउन वि.स. २०७३÷०७४ देखि शुुरु भएको योजनाको हालसम्म ८५ प्रतिशत भौतिक प्रगति भएको योजनाका सूचना अधिकारी बिष्णु चापागाईले बताउनुभयो ।
रु. १० अर्ब लागत अनुमान गरिएको यो सडक आव २०७९÷८० मा सम्पन्न गर्ने लक्ष्य राखिएको थियो । निर्धारित समयमा काम सम्पन्न हुन नसकेपछि आयोजना अवधिलाई आव २०८२÷८३ सम्म लम्ब्याइएको छ । सडक र पुल निर्माणका लागि रु सात अर्बको ठेक्का सम्झौता भएकामा गत असारसम्म रु छ अर्ब खर्च भएको छ ।
भारत र चिनलाई जोड्ने चार सय ३५ किलोमिटर दुरिको कालीगण्डकी करिडोर सडकलाई गण्डकी प्रदेशको भाग्यरेखा मानिएको छ । सडकले पुर्वाधार, आर्थिक, व्यापारिक, जलविद्युत, पर्यटन र धार्मिक स्थलको विकासका लागि महत्वपूर्ण योगदान पुग्ने अपेक्षा गरिएको छ ।
