बेनी । म्याग्दी बहुमुखी क्याम्पसमा यही चैत ५ गते हुन लागेको स्वतन्त्र विद्यार्थी युनियनको चुनावका उमेद्वारहरुको शुक्रबार सामुहिक परिचय र प्रतिवद्धता सार्वजनिक गरिएको छ ।
म्याग्दी जेसिजको आयोजनामा भएको कार्यक्रममा नेविसंघ, अनेरास्ववीयु क्रान्तिकारी, अनेरास्ववीयु र अनेरास्ववीयु समाजवादीका उमेद्वारको परिचयका साथै प्रतिवद्धता सार्वजनिक गरेका हुन् ।
स्ववीयु चुनावका उमेद्वारहरुको मुद्दालाई एकै मञ्चबाट विद्यार्थी समक्ष पु¥याउने र विद्यार्थीहरुको समस्या तथा अपेक्षा पहिचान गर्ने उद्देश्यले कार्यक्रम गरिएको म्याग्दी जेसिजका अध्यक्ष बिनोद जिसीले बताउनुभयो ।
कार्यक्रममा नेविसंघबाट सभापतिका उमेद्वार संगम चोखाल क्षेत्रीले क्याम्पसका विद्यार्थीहरुको समस्या समाधानका लागि क्याम्पस प्रशासन र ब्यवस्थापनसँग पैरवी गर्ने बताउनुभयो । छात्र छात्रावास, खेलकुद गतिबिधी र शैक्षिक सुधारका मुद्दामा चोखालले जोड दिनुभयो ।
अनेरास्ववीयु क्रान्तिकारीबाट सभापतिका उमेद्वार सन्दिप खत्रीले पारदर्शी, जवाफदेही र शुसासन सहितको म्याग्दी बहुमुखी क्याम्पस बनाउन आफु र क्रान्तिकारीको प्यानललाई भोट दिन आग्रह गर्नुभयो । क्युएएको निरन्तरता, विद्यार्थी संख्या बढाउने र शूल्क वृद्धि हुन नदिने, क्याम्पसलाई समाजसँग जोड्ने र प्रशासनलाई विद्यार्थीमैत्री बनाउने उहाँले बताउनुभयो ।
अनेरास्ववीयुका सभापतिका उमेद्वार दिनेश खत्रीले विगतदेखिनै विद्यार्थीहरुको साथमा रहेको बताउदै शैक्षिक, खेलकुद, भौतिक पूर्वाधारसँग सम्बन्धी एजेण्डालाई क्याम्पस प्रशासन र व्यवस्थापनसँग समन्वय गरेर पुरा गर्ने बताउनुभयो । क्युएएको नविकरणलाई प्राथमिकता दिने उहाँले बताउनुभयो ।
अनेरास्ववीयु समाजवादीकी सभापतिका उमेद्वार मनिषा परियारले म्याग्दी क्याम्पसको शैक्षिक सुधारका लागि विद्यार्थीहरुको पक्षमा काम गर्न आफु उमेद्वार बनेको बताउनुभयो । सभापतिका उमेद्वारहरुलाई विद्यार्थीहरुले योजना र प्रतिवद्धताका विषयमा प्रश्न गरेका थिए ।
एक जना उमेद्वारलाई आफ्नो योजना र प्रतिवद्धता प्रस्तुत गर्नका लागि पाँच मिनेटको समय दिइएको थियो । नेपाल जेसिजका उपाध्यक्ष सन्दिप खत्रीले सहजिकरण गर्नुभएको कार्यक्रममा क्याम्पस सञ्चालक समितिका अध्यक्ष दिपेन्द्र श्रेष्ठ (दिपु), क्याम्पस प्रमुख श्रीधर सुवेदी, लगायत सञ्चालक समितिका पदाधीकारी, सदस्य र प्राध्यापकहरुको उपस्थिति थियो ।
