बेनी, ः म्याग्दीको रणनीतिक महत्वको बेनी–दरबाङ सडकको रणवाङ–तोलावाङ खण्डमा कालोपत्र भएको छ ।
मङ्गला गाउँपालिका–२ रणवाङको खहरेखोला देखि रणवाङ–सहश्रधारा–दुखुखोला– तल्लोदुखु– रातोढुङ्गा हुदै तोलावाङ खण्डको सडक कालोपत्र सकिएको हो । पूर्वाधार विकास कार्यालय म्याग्दीका प्रमुख बिष्णुप्रसाद पौडेलले खहरेखोला देखि तोलावाङ सम्म तीन किलोमिटर तीन सय मिटर सडक कालोपत्र भएको बताउनुभयो ।
“फराकिलो पार्ने, नाली, टेवा पर्खाल बनाउने, बेस र सबबेस राख्ने काम सकिएको ठाउँमा माघ १९ गतेदेखि शुरु गरिएको कालोपत्र गर्ने काम फागुन २७ गते सकिएको छ,” उहाँले भन्नुभयो “बाङ्गेपहिरो छोडेर बाँकी ढाडखर्क, दरबाङ बजारमा भैरहेको पूर्वाधार निर्माणको काम सकिएपछि कालोपत्र गर्ने तयारी छ ।”
गण्डकी प्रदेशको ‘एक निर्वाचन क्षेत्र एक सडक’ कार्यक्रम अन्तरगत पूर्वाधार विकास कार्यालय म्याग्दी मार्फत दुई वर्षमा सम्पन्न गर्ने लक्ष्य सहित पाँच वर्षअघि ठेक्का सम्झौता भएको सडक निर्माणको काम अलपत्र बनेको थियो ।
मंगला गाउँपालिका–२ रणवाङ देखि मालिकाको केन्द्र दरबाङ सम्मको आठ किलोमिटर सडक कालोपत्रे गर्न वि.स. २०७६ जेठ ३१ गते विरुवा–क्याराभान जेभी र पूर्वाधार विकास कार्यालय म्याग्दीबीच रु. २२ करोड ५७ लाख ९३२ मा ठेक्का सम्झौता भएको थियो ।
२०७८ जेठ महिनामा सकिनुपर्ने सो योजनाको हालसम्मको भौतिक प्रगति ८५ प्रतिशत रहेको कार्यालयले जनाएको छ । निर्माण कम्पनीका प्राविधिक देवराज राउतले चालु आर्थिक वर्षभित्रनै कालोपत्र सम्पन्न गर्ने लक्ष्य सहित उपकरण र मजदुर परिचालन गरेको बताउनुभयो । पर्याप्त बजेट बिनियोजन नहुनु, नदीजन्य निर्माण सामग्रीको अभाव, विपद् र कोरोना महामारीका कारण ढिलाई भएको निर्माण कम्पनीका सञ्चालक चन्द्र थकालीले बताउनुभयो ।
गत वर्ष रु. पाँच करोड बजेट बिनियोजन भएको यो आयोजनालाई यसपाली रु. दुई करोड ४० लाख बिनियोजन भएको छ । म्याग्दीको लाइफ लाइन (भाग्यरेखा) मानिएको बेनी–दरवाङ सडक निर्माणमा भएको ढिलाईले यात्रुलाई सास्ती, दुर्घटनाको जोखिम र यातायात सञ्चालन गर्न असहज भएपछि जनप्रतिनिधी र अगुवाहरुले दवाव दिदै आएका थिए ।
सडक कालोपत्र भएपछि यात्रा सहज भएको मालिका गाउँकार्यपालिकाका प्रवत्ता अनुप गौचनले बताउनुभयो । कामलाई गुणस्तरीय बनाउन निगरानीका साथै सामाजिक समस्या समाधानका लागि सहजिकरण र समन्वय गरेको उहाँले बताउनुभयो ।
सो खण्डमा पर्ने बाङ्गेपहिरो क्षेत्र पहिरोग्रस्त र जोखियुक्त छ । पहिलो प्रभावित क्षेत्रलाई ठेक्काबाट हटाइएको छ । मालिकाको केन्द्र दरवाङ बजारभित्र जग्गा विवाद नभएको वाहेकका ठाउँमा कालोपत्रको तयारी गरिएको छ ।
मंगला, मालिका र धवलागिरी गाउँपालिकालाई जिल्ला सदरमुकाम बेनीसँग जोड्ने २४ किलोमिटर दुरिको यो सडक वि.स. २०६३ मा मार्ग खुलेको थियो । बागलुङको तमानखोला गाउँपालिकाका बासिन्दाले पनि प्रयोग गर्ने मध्य पहाडी लोकमार्गको बागलुङ खण्डको विकल्प भएकाले भएकाले रणनीति महत्वको मानिएको छ ।
बेनी देखि सिम सम्म १२ दशमलब पाँच किलोमिटर तीन वर्षअघि कालोपत्र भएको थियो । सिम–पानाबगर खण्डको चार किलोमिटर सडकको गत जेठ महिनामा काम सकिएको छ । दरवाङ देखि धवलागिरी गाउँपालिकाको केन्द्र मुना जोड्ने सडक कालोपत्र सहित स्तरोन्नति गर्न एक वटा योजना चालु रहेको र थप रु. ९२ करोड बजेटको योजना कार्यान्वयनका लागि ठेक्का आव्हान भइसकेको म्याग्दी १(२) बाट निर्वाचित गण्डकी प्रदेशसभा सदस्य रेशम जुग्जाली (सुविन)ले बताउनुभयो ।
“धारापानी–ताकम–शिवाङ खण्डको चार किलोमिटर कालोपत्र र ग्राभेलका लागि धमाधम काम भइरहेको छ,” उहाँले भन्नुभयो “गतवर्ष ग्राभेल भएको दरवाङ–धारापानी खण्डको सात किलोमिटर र शिवाङ देखि मुना खण्डको सडक कालोपत्र गर्न संघीय र प्रदेश सरकारको साझेदारीमा रु. ९२ करोड बजेटको योजनाको ठेक्का आव्हानको भएको छ ।”
गण्डकी प्रदेशका पूर्व भौतिक पूर्वाधार विकास तथा यातायात ब्यवस्था मन्त्री समेत रहेका जुग्जालीले काम भइरहेका र सम्पन्न हुने चरणमा रहेका योजनाहरुमा बजेट अभाव भएकाले मुख्यमन्त्री र विभागीय मन्त्रीहरुलाई थप बजेट ब्यवस्था र रकमान्तरका लागि पहल गरेको बताउनुभयो ।
