बेनी, ः पर्वतारोहणको क्षेत्रमा विश्वमै दुलर्भ कीर्तिमान बनाएका हिमाल आरोही निर्मल पूर्जा ‘नम्स’लाई बिहिबार गृहजिल्ला म्याग्दीमा नागरिक अभिनन्दन् सहित सम्मान गरिएको छ ।
पर्वतारोहणको क्षेत्रमा बिना अक्सिजन (पूरक अक्सिजन) आठ हजार मिटरभन्दा अग्ला सबै १४ चुचुरोमा ५० पटक पाइला टेक्ने र सातै महादेशका अग्ला हिमाल (सेभेन समिट) पहिलो पटक आरोहण गरेर किर्तिमान बनाएका पुर्जाको जन्मथलो म्याग्दीको अन्नपूर्ण गाउँपालिका–३ दानाको तितर हो ।
स्थानीय तहका प्रमुख, राजनीतिक दल, सरकारी तथा गैरसरकारी संस्था सहित सरोकारवाला निकायको उपस्थितीमा पुर्जालाई बाजागाजा र झाँकी सहित जिल्ला सदरमुकाम बेनीबजार परिक्रमा गराई जिल्ला समन्वय समितिको सभाहलमा भएको समारोहमा सम्मान गरिएको थियो ।
निर्मल पूर्जा ‘निम्स दाई’ सम्मान मुल समारोह समितिका संयोजक हरिकृष्ण गौतमले म्याग्दीलाई विश्वभर चिनाउन योगदान गरेकाले किर्तिमानी आरोही पुर्जालाई नागरिक तहबाट सम्मान र नागरिक अभिनन्दन् गरिएको बताउनुभयो ।
४० वर्षीय पुर्जाले आरोहणका क्रममा करिब ४० वटा किर्तिमान बनाउनु भएको छ । दुई वर्ष छ महिनाको अवधीमा अतिरिक्त अक्सिजन प्रयोग नगरी आठ हजार मिटर भन्दा अग्ला १४ वटै हिमालको आरोहण, सबैभन्दा छोटो अवधी (छ महिना छ दिन)मा आठ हजार मिटर अग्ला सबै हिमाल आरोहण गरेर किर्तिमान बनाएका पुर्जाले ती हिमालहरु सबैभन्दा धेरै पटक आरोहण गरेको किर्तिमान पनि बनाउनुभयो ।
उहाँले हालसम्म विश्वका आठ हजार मिटर अग्ला हिमालहरु ५० पटक आरोहण गर्नुभएको छ । पुर्जाले पाकिस्तान र चिनको सिमानामा रहेको संसारको दोस्रो आठ हजार छ सय ११ मिटर अग्लो केटुमा सन् २०२१ को जनवरीमा जाडो याममा आहोहरण गरेर इतिहाँस रच्नुभएको थियो । सन् २०१९ को मार्च महिनामा मासिक रु. १४ लाख तलव हुने बेलायती गोर्खा सैनिकको जागिर छाडेर ‘प्रोजेक्ट् पोसिबल’ नामको हिमाल आरोहण अभियान थाल्नुभएको थियो ।
कार्यक्रममा बेनी नगरपालिका ३ भकिम्ली निवासी एक सय एक वर्षीय भैरबहादुर हुमेन, स्थानीय तहका प्रमुख र म्याग्दी उद्योग वाणिज्य संघ लगायतका संघसंस्थाले पुर्जालाई सम्मानपत्रबाट सम्मान गरिएको छ । जन्म जिल्ला म्याग्दीमा सम्मानित हुन पाउँदा गौरब र थप उत्साह मिलेको पर्वतारोही पुर्जाले बताउनुभयो । उहाँले म्याग्दीको पर्यटन क्षेत्रको विकासमा आफ्नो तर्फबाट पहल गर्ने प्रतिवद्धता व्यक्त गर्दै सम्मान गर्ने जिल्लावासीहरुलाई धन्यवाद दिनुभयो। सम्मान कार्यक्रम पूर्व बेनीमा पुर्जालाई बाजागाजा र साँस्कृतिक झाँकी सहित भव्यरुपमा स्वागत गरिएको थियो ।
पूर्जाले ‘निम्स’ले म्याग्दीमा रहेको संसारकै १० औं अग्लो अन्नपूर्ण हिमाल र सातौं अग्लो धौलागिरि हिमालबाट आरोहण थाल्नुभएको थियो । पाकिस्तान र चीनको सिमानामा अवस्थित संसारकै दोस्रो अग्लो आठ हजार ६ सय ११ मिटर अग्लो के–टु’ हिमालमा विन्टर सिजन (जाडो याम) मा सफल आरोहण गर्ने विश्वकै पहिलो आरोही समेत हुनुहुन्छ । बेलायती सेनाको विशेष सैनिक फोर्सबाट अवकाश लिनुभएका पूर्जाले जिल्ला प्रशासन कार्यालय म्याग्दीबाट गत वर्ष गैर आवासीय नेपाली नागरिकता लिनुभएको थियो ।
