बेनी ः म्याग्दीको रघुगङ्गा गाउँपालिका भएर बग्ने राहुघाट नदीमा निर्माणाधिन ४८ दशमलब पाँच मेगावाट क्षमताको अपर (माथिल्लो) राहुघाट जलविद्युत आयोजना निर्माणको अन्तिम चरणमा पुगेको छ ।
तुँदी पावर प्रर्वद्धक रहेको आयोजनाले बाँध, विद्युतगृह, सुरुङ, प्रशारण लाइन निर्माणलाई पूर्णता दिने र विद्युतगृहमा उपकरण जडानको काम अन्तिम चरणमा पुगेको हो । सन् २०२५ को जुलाई महिनाभित्र विद्युत उत्पादन गर्ने लक्ष्य सहित धमाधम काम भइरहेको आयोजनाका आवासीय इन्जिनियर नरोत्तम कार्कीले जानकारी दिनुभयो ।
“हालसम्म सिभिलतर्फ ९५, हाइड्रोमेकानिकल ८० र इलेक्ट्रोमेकानिकलको ७० प्रतिशत प्रगति भएको छ,” उहाँले भन्नुभयो “विद्युतगृहमा कन्ट्रोल रुम र पानी नदीमा मिसाउने टेलरेस बाहेकका भौतिक संरचना निर्माण सकिएको छ ।”
तुदीँ पावरका हाइड्रो मेकानिकल इञ्जिनियर घनश्याम भट्टराईले विद्युतगृह भित्र टवाईन, जेनेरेटरका उपकरण जडानको काम तिब्रताका साथ भइरहेको बताउनुभयो । अपर राहुघाटको इलेक्ट्रोमेकानिल ठेकेदार एभरेष्ट हाइड्रो हो । माछापुच्छ्रे मेटल एण्ड मेसिनरी हाइड्रोमेकानिकल ठेकेदार हो ।
रघुगङगा गाउँपालिका–७ चिमखोलामा बाँध र वडा नम्बर –४ दग्नामको फेदीमा विद्युतगृह रहेको यस आयोजनाको सुरुङ चार हजार नौ सय मिटर लामो छ । आउटलेट देखि विद्युतगृह सम्म छ सय ८० मिटर लामो पेनस्टक पाईप जडानको काम अब एक सय मिटर मात्र बाँकी छ । विद्युतगृहबाट उत्पादन भएको विद्युतलाई प्रशारण लाइनमा जोड्ने स्विचार्ड निर्माण थालिएको छ ।
तुँदी पावरले राहुघाटमै निर्माण गरेको अर्को ३७ दशमलब पाँच मेगावाट क्षमताको मङ्गले राहुघाट जलविद्युत आयोजनाले अबको एक महिनाभित्र परिक्षण शुरु गर्ने तयारी गरेको छ । रघुगङगा गाउँपालिका–८ को बन्दीमा बाँध, वडा नम्बर –७ को चिमखोलामा विद्युतगृह र पाँच हजार तीन सय २८ मिटर लामो सुरुङको सबै काम सकिएको छ ।
मङगले राहुघाटको विद्युतगृहबाट निस्कने र चिमखोलाको बगरखोलाको पानी मिनाउन मिल्ने गरि अपर राहुघाटको बाँध निर्माण गरिएको छ । दुई वटै आयोजनाको अनुमानित लागत रु. १३ अर्ब हो । अपर राहुघाट र मङगले राहुघाटबाट उत्पादीत बिद्युत केन्द्रिय प्रशारण लाइनमा जोड्न रघुगंगा–३ अम्बाङमा बन्न लगेको राहुघाट सबस्टेशन देखि चिमखोलासम्म दुई सय केभी क्षमताको १४ किलोमिटर दुरीको प्रशारण लाईन निर्माण अन्तिम चरणमा पुगेको छ ।
नेपाल विद्युत प्राधिकरणले अम्बाङमा सवस्टेशन निर्माणमा ढिलाई गरेकाले वैकल्पिक माध्यमबाट विद्युत राष्ट्रिय प्रशारणमा आवद्ध गराउने तयारी गरिएको छ । राहुघाट नदीको सहायक ठुलोखोलामा संयुक्त उर्जा प्रा.लीले २१.३ मेगावाट क्षमताको ठुलोखोला र ठुलोखोला हाइड्रोपावर लिमिटेडले २२.५ मेगावाट क्षमताको माथिल्लो ठुलोखोला जलविद्युत आयोजना निर्माण गरिरहेका छन् । राहुघाट नदीमै नेपाल बिद्युत प्राधिकरणको सहायक कम्पनी रघुगंगा हाइड्रो लिमिटेडले ४० मेगावाट क्षमताको राहुघाट जलबिद्युत आयोजना निर्माण गरिरहेको छ ।
