बेनी, । पर्वतको जलजला गाउँपालिका–७ मिलनचोकमा शनिबार शून्य भेदभाव दिवसको अवसरमा जातीय, लैङ्गिक, धार्मिक, वर्गीय विषयक पालिका स्तरीय सचेतना तथा अन्तरक्रिया कार्यक्रम सम्पन्न भएको छ ।
नेपाल दलित संघ जलजला गाउँपालिकाको आयोजनामा भएको कार्यक्रममा विभेद अन्त्यका लागि भएका कानुनी ब्यवस्था, सामाजिक अवस्था, चुनौति र विभेद अन्त्यका लागि गर्नुपर्ने कामका विषयमा छलफल भएको थियो ।
कार्यक्रममा सहभागिहरुले समाज विकासक्रमसँगै विभेदको प्रवृत्ति र स्वरुप फेरिएको अनुभव सुनाएका थिए । समावेशी, समानुपातिक ब्यवस्थाले नीति निर्माण तहमा भएको पछाडी पारिएको समुदायको सहभागितालाई अर्थपूर्ण बनाउन, चेतना र शिक्षाको विकासको माध्यमबाट विभेदलाई अन्त्य गर्न सकिने जलजला गाउँपालिकाका अध्यक्ष राजुप्रसाद आचार्यले बताउनुभयो ।
कार्यक्रममा महिला अधिकारकर्मी जमुना आचार्य र नेपाली काँग्रेसका जलजलाका उपसभापति निर्मला खत्री लैङ्गिक र जातीय विभेद अन्त्यका लागि गर्नुपर्ने पहलका विषयमा प्रशिक्षण दिनुभएको थियो । नेपाल दलित संघ जलजलाका अध्यक्ष वुद्धि परियारको अध्यक्षतामा भएको कार्यक्रमको सञ्चालन सदस्य रेनु दर्जी र स्वागत सहसचिव मिना परियारले गर्नुभएको थियो ।
