नारच्याङ, म्याग्दीको अन्नपूर्ण गाउँपालिका–४ नारच्याङमा शुक्रबार सम्पन्न प्रथम तरुण कप भलिबल प्रतियोगिताको उपाधी पुरुषतर्फ बेनी नगरपालिका–९ घतान र महिलातर्फ अन्नपूर्ण गाउँपालिकाले जितेका छन् ।
म्याग्दी प्रदेशसभा क्षेत्र १(१) अन्तर्गतका बेनी नगरपालिका, रघुगङ्गा र अन्नपूर्ण गाउँपालिकाका वडा स्तरीय पुरुष भलिबल प्रतियोगितामा रघुगङ्गा गाउँपालिका–२ भगवतिलाई दुईका विरुद्ध तीन सेटले पराजित गर्दै घतान बिजयी भएको हो ।
नेपाल तरुण दल म्याग्दीको आयोजनामा तीन दिन सम्म सञ्चालन भएको प्रतियोगितामा १६ वटा वडाले सहभागिता जनाएका थिए । प्रतिस्पर्धात्मक खेलमा घतानले भगवतिलाई पहिलो, चौथो र पाँचौ सेट ३१–२९, २५–१९ र १५–११ को अन्तरमा जितेको थियो । दोस्रो र तेस्रो सेट भगवतिले घतानलाई २५–२१ र २५–२२ को अन्तरमा जितेको थियो ।
ट्रफी, कप, मेडल र प्रमाणपत्र सहित बिजेताले रु. एक लाख ११ हजार एक सय ११ र उपबिजेताले रु. ६६ हजार छ सय ६६ नगद पुरस्कार प्राप्त गरेका तरुण दल म्याग्दीका कार्यवाहक अध्यक्ष श्रीप्रसाद रोकाले जानकारी दिनुभयो ।
पाँच वटा स्थानीय तह सहभागी स्थानीय तह स्तरीय महिला भलिबल प्रतियोगितामा मङ्गला गाउँपालिकालाई पराजित गर्दै अन्नपूर्णले उपाधी चुमेको हो । अन्नपूर्णले मङ्गलालाई पहिलो, दोस्रो र चौथो सेट २५–२३, २५–१५ २५–१९मा पराजित गरेको थियो । मंगलाले तेस्रो सेट २५–२१ को अन्तरमा जितेको थियो ।
महिला भलिबलमा ट्रफी, कप, मेडल र प्रमाणपत्र सहित बिजेतालाई रु. ७७ हजार सात सय ७७ र उपबिजेतालाई रु. ४४ हजार चार सय ४४ पुरस्कार प्रदान गरिएको तरुण दल म्याग्दीका सचिव नगेन्द्र मल्लले बताउनुभयो ।
बिजेता र उपबिजेता खेलाडीहरुलाई प्रतिनिधीसभा सदस्य तथा नेपाली काँग्रेस म्याग्दीका सभापति खमबहादुर गर्बुजा (खम्बिर), उपसभापति हरिकुमार श्रेष्ठ, कर्णबहादुर भण्डारी (केबी), तरुण दलका कार्यवाहक अध्यक्ष रोकालगायतले पुरस्कार वितरण गर्नुभएको थियो ।
यसअघि मालिका गाउँपालिकाको केन्द्र दरवाङमा फागुन ७ देखि ९ गतेसम्म सञ्चालन भएको प्रदेशसभा क्षेत्र (ख) को वडा स्तरीय तरुण कप पुरुष भलिबल प्रतियोगितामा मङ्गला गाउँपालिका–२ बाबियाचौरलाई एकका विरुद्ध तीन सेटले पराजित गर्दै मङ्गला गाउँपालिका–५ अर्मनले जितेको थियो ।
भलिबल प्रतियोगिताको साथै स्थानीय तथा राष्ट्रिय कलाकारहरुको गित तथा नृत्य प्रस्तुतिका सहितको तरुण साँझ पनि भएको थियो । म्याग्दीमा लोकप्रिय भलिबल खेलको प्रर्वद्धन, खेल प्रतिभाको पहिचान, प्रोत्साहन गर्ने उद्देश्यले भलिबल प्रतियोगिता आयोजना गरेको तरुण दल म्याग्दीका उपाध्यक्ष सोहन श्रेष्ठ (विश्वास)ले बताउनुभयो ।
