दरवाङ । मालिका गाउँपालिकाको केन्द्र दरवाङमा बिहिबार सम्पन्न म्याग्दीको प्रदेशसभा क्षेत्र (ख) को वडा स्तरीय तरुण कप पुरुष भलिबल प्रतियोगिताको उपाधी मङ्गला गाउँपालिका–५ अर्मनले जितेको छ ।
नेपाल तरुण दल म्याग्दीले आयोजना गरेको प्रतियोगितामा मङ्गला गाउँपालिका–२ बाबियाचौरलाई एकका विरुद्ध तीन सेटले पराजित गर्दै अर्मन बिजयी भएको हो । प्रदेशसभा १(२) मा पर्ने मङ्गला, मालिका र धवलागिरी गाउँपालिकाका १८ समूहको सहभागिता रहेको प्रतियोगिता दुई दिनसम्म सञ्चालन भएको थियो ।
बिजेतालाई रु. एक लाख ११ हजार एक सय ११ र उपबिजेतालाई रु. ६६ हजार छ सय ६६ नगद सहित ट्रफी, मेडल र प्रमाणपत्र प्रदान गरिएको तरुण दल म्याग्दीका कार्यवाहक अध्यक्ष श्रीप्रसाद रोकाले बताउनुभयो । बिजेता र उपबिजेता टिमका खेलाडीहरुलाई नेपाल तरुण दलका अध्यक्ष विद्धान गुरुङ लगायतले पुरस्कार वितरण गर्नुभएको थियो ।
भलिबल प्रतियोगिताको साथै कलाकारहरु खड्ग गर्बुजा, कुमार पुन, सम्बोज मल्ल, रविना भण्डारी, पविता पुनलगायतको गित तथा नृत्य प्रस्तुति सहितको तरुण साँझ पनि आयोजना गरिएको थियो ।
दरवाङका साथै यही फागुन १४ देखि १६ गतेसम्म अन्नपूर्ण गाउँपालिका–४ नारच्याङमा प्रदेशसभा १(१) मा पर्ने बेनी नगरपालिका, रघुगङ्गा र अन्नपूर्ण गाउँपालिकाको अन्तर वडा क्षेत्रीय पुरुष र अन्तर पालिका जिल्ला स्तरीय महिला भलिबल प्रतियोगिता आयोजना गरिएको छ ।
पुरुष भलिबल प्रतियोगिताको बिजेता र उपबिजेतालाई क्षेत्र १(२) बराबरको तथा महिला भलिबलमा बिजेतालाई ७७ हजार सात सय ७७ रुपैयाँ र उपबिजेतालाई ४४ हजार चार सय ४४ रुपैयाँ पुरस्कार प्रदान गरिने तरुण दल म्याग्दीका सचिव नगेन्द्र मल्लले बताउनुभयो ।
म्याग्दीमा लोकप्रिय भलिबल खेलको प्रर्वद्धन, खेल प्रतिभाको पहिचान, प्रोत्साहन गर्ने उद्देश्यले भलिबल प्रतियोगिता आयोजना गरेको तरुण दल म्याग्दीका उपाध्यक्ष सोहन श्रेष्ठ (विश्वास)ले बताउनुभयो । प्रतियोगिता सञ्चालन गर्न १५ लाख रुपैयाँ खर्च हुने तरुण दल म्याग्दीले जनाएको छ ।
