बेनी । बेनीको कुमारी बहुउद्देश्यीय सहकारी संस्थाको करिब रु. एक अर्ब पचास करोड रकम अपचलन सम्बन्धी मुद्दामा छानविनका लागि प्रहरीले थप एक जनालाई पक्राउ परेको छ ।
बेनी नगरपालिका–४ का लोकेश पुनमगरलाई पक्राउ गरि बिहिबार जिल्ला अदालत म्याग्दीबाट फागुन १३ गतेसम्मका लागि म्याद थप गरि हिरासतमा राखिएको जिल्ला प्रहरी कार्यालय म्याग्दीले जनाएको छ ।
प्रहरी निरीक्षक सागर पौडेलले मङगलवार पक्राउ परेका पुनलाई यसअघि माघ २० गते पक्राउ परेका अन्य पाँच जनासँगै अदालत उपस्थित गराउने गरि म्याद थप भएको बताउनुभयो ।
सहकारी रजिष्ट्रारको कार्यालय पोखराले छ हजार बचतकर्ता रहेको कुमारी सहकारीको रु. एक अर्ब ४९ करोड अपचलनमा संलग्न पुनलगायतलाई सहकारी ऐन–२०७४ अन्तर्गत परिभाषित कसूरमा अनुसन्धान गरि मुद्दा चलाउन प्रहरीलाई सिफारिस गरेको थियो ।
सहकारीका पूर्व सञ्चालक समितिका उपाध्यक्ष रहेका जिल्ला समन्वय समिति म्याग्दीका प्रमुख राजकुमार थापा, तत्कालिन व्यवस्थापक रुद्र गुरुङ, सञ्चालक समितिका पुर्व अध्यक्ष मन प्रसाद थजाली, थमबहादुर गर्वुजा र सञ्चालक देवी कुमारी थापालाई गत माघ २० गते पक्राउ र अदालतमा मुद्दा दर्ता गरी अनुसन्धानका लागि हिरासतमा राखेको छ ।
उनिहरुलाई अनुसन्धानका लागि पहिलो पटक तीन दिन, माघ २३, २८ र फागुन ४ गते सात÷सात दिनको दरले म्याद थप गरिएको म्याग्दी जिल्ला अदालतका श्रेष्तेदार भोलाराज रेग्मीले बताउनुभयो । एउटै मुद्दाका आरोपीलाई प्रहरीले २५ दिन भन्दा बढी हिरासतमा राख्न पाउदैन् ।
सहकारी रजिष्ट्रारको कार्यालयले गरेको एक सय १९ पृष्ठको छानविन प्रतिवेदन अनुसार वि.स. २०६५ मा खुलेको कुमारी सहकारीमा दुई कार्यकाल सचिव र वि.स. २०७९ मा जिसस प्रमुख निर्वाचित हुनुअघिसम्म उपाध्यक्ष रहेका थापाको योजनामा बचतकर्ताको रकम व्यक्तिगत स्वार्थमा नियम विपरित प्रयोग भएको उल्लेख छ ।
गत स्थानीय तह निर्वाचनमा नेकपा एमालेबाट बेनी नगरपालिका–१ का वडा सदस्य हुदै जिसस प्रमुख निर्वाचित भएका थापा उक्त पार्टीको जिल्ला कमिटिको पूर्व उपसचिव पनि हुनुहुन्छ । पुन बेनीको कस्तुरी बहुउद्देश्यीय सहकारी संस्थाको प्रबन्धक हुन् । कस्तुरी सहकारीले पनि बचतकर्ताको रकम फिर्ता गर्न नसकेको गुनासो गरेका छन् ।
प्रतिवेदन अनुसार बुद्ध एकेडेमीमा सहकारीबाट बिनाधितो रु. १६ करोड ऋण लगानी गरेका थापा र पुनले सहकारीबाट थप रु. १८ करोड निकालेर पर्वतको जलजला गाउँपालिकामा जग्गा किनेका छन् । यसैगरी सहकारीबाट बिनाधितो रु. १० करोड निकालेर थापा, पुन, गेमबहादुर घर्ती र मनप्रसाद थजालीका नाममा जग्गा खरिद भएको छानविनका क्रममा भेटिएको थियो ।
