बेनी, । भौगोलिक रुपमा विकट र दुर्गम क्षेत्रमा अवस्थित म्याग्दीको धवलागिरी गाउँपालिका–४ बगर गाउँ सडक सञ्जालमा जोडिएको छ ।
६५ मेगावाट क्षमताको म्याग्दीखोला जलविद्युत आयोजनाले नाउरा हुदै बगर जोड्ने सडक निर्माण गरेपछि बुधबार पहिलो पटक गाडी पुगेको छ । बगरका बासिन्दा समेत रहनुभएका धवलागिरी गाउँपालिका–४ का वडा सदस्य हरिप्रसाद तिलिजाले गाउँमा पहिलो पटक गाडी आउँदा स्थानीयबासीमा खुसीयाली छाएको बताउनुभयो ।
“नाउरा देखि बगर पुग्न हिड्न सक्नेलाई दुई घण्टा र नसक्नेलाई पाँच घण्टा भिरको अप्ठ्यारो बाटो हिड्नुपर्दथ्यो,” उहाँले भन्नुभयो “सडक बनेपछि गाडी चढेर बगर देखि ३० मिनेटमा नाउरा पुग्न सकिने भएको छ ।”
सडकबाट बगर र सिम्कोस गाउँका ५५ घरधुरीलाई गाउँपालिकाको केन्द्र मुना, वडाको केन्द्र मुदी, जिल्ला सदरमुकाम बेनी सहित छिमेकी गाउँहरुमा आवत जावत गर्न, दैनिक उपभोग्य बस्तु र निर्माण सामग्री ढुवानी गर्न सहज भएको छ । बगर धौलागिरि आधार शिविर जाने धौलागिरि चक्रिय पदमार्गको अन्तिम मानव बस्ति हो ।
म्याग्दीखोला जलविद्युत आयोजनाका प्रमुख ज्योतिकुमार केसीले अपर म्याग्दी १ जलविद्युत आयोजनाको खाम्ला स्थित बाँध निर्माण स्थल देखि बगरसम्मको सडकको दुरी छ किलोमिटर रहेको बताउनुभयो । हाइड्रो भिलेज प्रा.ली. प्रर्वद्धक रहेको म्याग्दीखोलाले पहुँचमार्ग निर्माणका लागि गत वर्ष हेलिकप्टरबाट बगरमा डोजर लगेको थियो ।
बगर र नाउरा दुई तर्फबाट डोजर परिचालन गरेर सडक निर्माण गरिएको हो । म्याग्दीखोला र हाइड्रो इम्पाएरले निर्माण गर्न लागेको ३७ मेगावाट क्षमताको अपर म्याग्दीखोला जलविद्युत आयोजनाले बगर जाने सडक अन्तर्गत नाउरा स्थित म्याग्दी नदीमा ४७ मिटर लामो बेलिब्रिज जडान गरेका थिए । जेल्तुङ देखि दोभानमा निर्माण हुन लागेको बाँध सम्म जोड्ने पहुँच मार्ग निर्माणको कामलाई निरन्तरता दिइने केसीले बताउनुभयो ।
म्याग्दीखोला जलविद्युत आयोजनाको प्रर्वद्धक हाइड्रो भिलेज उर्जा डेभलपर्स प्रा.लीको भगिनी कम्पनी हो । उर्जा डेभलपर्सको अर्को भगिनी कम्पनी म्याग्दीखोला हाइड्रो लिमिटेड मार्फत ५३ दशमलब पाँच मेगावाट क्षमताको अपर म्याग्दी १ जलविद्युत आयोजना निर्माणाधिन छ ।
आयोजनाले छ सय २६ दशमलब ५० मिटर हेड् र म्याग्दी खोलाको १२ दशमलब ५० घन मिटर प्रति सेकेण्ड बहाव प्रयोग गरी विद्युत उत्पादन गर्ने कम्पनीले जनाएको छ । आयोजना निर्माण थालनी भएको ४० महिनाभित्र आयोजना सम्पन्न हुनेछ ।
आयोजना सम्पन्न भएपछि सुख्खा याममा १०३.११ गिगावाट आवर (१०.३१ करोड युनिट) र वर्षायाममा २३२.८८ गिगावाट आवर (३२.२८ करोड युनिट) गरी वार्षिक ३३६ गिगावाट आवर (३३.६ करोड युनिट) विद्युत उत्पादन हुने कम्पनीले जनाएको छ ।
