बेनी ः म्याग्दीमा करिब चार हजार आठ सय जना किशोरीहरुलाई पाठेघरको मुखमा हुने क्यान्सर विरुद्धको एचपिभी खोप लगाइएको छ ।
म्याग्दीका छ वटै स्थानीय तहमा माघ २२ गतेदेखि २९ गतेसम्म एचपिभी खोप अभियान सञ्चालन भएको थियो । अभियान मार्फत चार हजार सात सय ९४ जनालाई (ह्युमन प्यापिलोमा भाइरस) एचपिभी खोप लगाइएको प्रदेश जनस्वास्थ्य कार्यालय, म्याग्दीले जनाएको छ ।
कार्यालयका प्रमुख भुवन ठकुराठीले लक्ष्य भन्दा बढी संख्यामा खोप लगाइएको बताउनुभयो । अन्नपूर्ण गाउँपालिकामा तीन सय ९७, रघुगङ्गामा पाँच सय दुई, धवलागिरिमा छ सय सात, मालिकामा आठ सय छ, मङ्गलामा पाँच सय ७२ र बेनी नगरपालिकामा एक हजार नौ सय १० जनाले एचपिभी खोप लगाएका छन् ।
“छात्रा तथा किशोरीहरूको उत्साहजन सहभागिताले खोप अभियान सफल भयो,“ ठकुराठीले भन्नुभयो, “खोप अभियानलाई सफल पार्न स्थानीय तहका जनप्रतिनिधि, कर्मचारी, स्वास्थ्यकर्मी, विद्यालय शिक्षक र सर्वसाधरणहरूको राम्रो सहयोग भयो ।”
जिल्लाभर चार हजार सात सय ६१ जना छात्रा तथा किशोरीलाई एचपीभी खोप लगाउने लक्ष्य रहेकोमा लक्ष्यभन्दा धेरै प्रगति हासिल भएको उहाँले बताउनुभयो । खोप लगाउनका लागि विद्यालय र स्वास्थ्य संस्था गरी एक सय ४२ वटा खोप केन्दको व्यवस्था गरिएको थियो । एक वटा केन्द्रमा एक जना स्वास्थ्यकर्मी र एक जना सहयोगी परिचालन भएका थिए ।
कक्षा छ मा अध्ययन गर्ने नौ सय २२ जना, कक्षा ७ देखि १० सम्म अध्ययन गर्ने तीन हजार सात सय ९८ र विद्यालय बाहिरका ६४ जना किशोरीले खोप लगाएको प्रदेश जनस्वास्थ्य कार्यालय म्याग्दीका जनस्वास्थ्य अधिकृत राजेन्द्रप्रसाद सापकोटाले जानकारी दिनुभयो ।
