बेनी । म्याग्दीको बेनी नगरपालिका–१ मा मङ्गलवारदेखि रु. एक लाख पुरस्कार राशीको चौथो रत्नेचौर जागरण कप भलिबल प्रतियोगिता शुरु भएको छ ।
रत्नेचौर जागरण समूहले आयोजना गरेको प्रतियोगिताको प्रतिनिधीसभा सदस्य खमबहादुर गर्बुजा (खम्बिर)ले उद्घाटन गर्नुभयो । माघ १९ गतेसम्म सञ्चालन हुने खुल्ला÷पालिका÷वडा स्तरीय पुरुष भलिबल प्रतियोगितामा १३ टिमको सहभागिता रहेको रेफ्री संयोजक जिल्ला भलिबल संघ म्याग्दीका महासचिव कुमार किसानले बताउनुभयो ।
उद्घाटन खेलमा बेनी नगरपालिका–१ र वडा नं.–२ को टिमलाई सोझो दुई सेटमा पराजित गर्दै दोस्रो चरणमा प्रवेश गरेको छ । प्रतियोगितामा बिजेता र उपबिजेतालाई ट्रफी, मेडल र प्रमाणपत्र सहित रु. एक लाख एक हजार एक सय एघार र रु. ५१ हजार एक सय ११ पुरस्कार प्रदान गरिने रत्नेचौर जागरण समूहका अध्यक्ष खमबहादुर पुनले बताउनुभयो ।
प्रतियोगिताको उद्घाटन कार्यक्रममा प्रतिनिधीसभा सदस्य गर्बुजा र गण्डकी प्रदेशसभा सदस्य हरिबहादुर भण्डारीले खेलकुदलाई ब्यायम र मनोरञ्जनका लागि मात्र नभई देशको प्रतिष्ठासँग जोड्नुपर्ने बताउनुभयो । रत्नेचौरमा निर्माणाधिन खेलमैदानलाई पूर्णता दिने प्रतिवद्धता जनाउदै रत्नेचौरमा खेल पर्यटनको सम्भावना रहेको बताउनुभयो ।
कप अन्तर्गत हुने एकल नृत्य प्रतियोगिताको बिजेतालाई रु. पाँच हजार र छेलो फाल्ने प्रतियोगिताको बिजेतालाई रु. पाँच हजार पुरस्कार प्रदान गरिने समूहका सदस्य अमर बोगटीले बताउनुभयो ।
पुरुष भलिबलको प्रथम पुरस्कारको प्रायोजन स्व. खड्गबहादुर पुनको स्मृतिमा उहाँका परिवारले गर्नुभएको छ भने दृतीय पुरस्कारको प्रयोजन हाल मलेसीयामा रहेका बिष्णु बोगटीले गर्नुभएको छ । एकल नृत्यको पुरस्कार प्रयोजन ई. टिकाबहादुर थापा र छेलो फाल्ने प्रतियोगिताको प्रथम पुरस्कार प्रयोजन कुमार पुनले गर्नुभएको छ ।
तोरी फुलेर मनमोहक बनेको रत्नेचौर पृष्ठभूमिमा देखिने धौलागिरी हिमालको दृष्य अवलोकनका लागि पछिल्लो समय पर्यटकको गन्तब्य बनेको छ । रत्नेचौरको श्रीहरी मन्दिर र कुडुले जोड्ने लामो झोलुङ्गे पुल पनि रत्नेचौरको अर्को आकर्षण हो ।
