दरवाङ, । म्याग्दीको मालिका गाउँपालिकाको केन्द्र दरवाङ स्थित जनप्रिय माविमा सोमबार गाउँपालिका स्तरीय चित्रकला, वक्तृत्वकला र हाजिरीजवाफ प्रतियोगिता सम्पन्न भएको छ ।
मालिका गाउँपालिकाको शिक्षा, युवा तथा खेलकुद शाखाको आयोजनामा आधारभूत कक्षा (१–५) स्तरीय चित्रकला, ६–८ स्तरीय वक्तृत्वकला र माध्यमिक तह (९–१०) स्तरीय हाजिरी जवाफ प्रतियोगिता भएको हो ।
विद्यार्थीहरुमा रहेको प्रतिभा पहिचान र प्रस्फुटनका लागि कार्यक्रम आयोजना गरिएको मालिका गाउँपालिकाका शिक्षा अधिकृत अशोक रिजालले बताउनुभयो । २४ विद्यालय सहभागी चित्रकला प्रतियोगितामा केवी एकेडेमीका कक्षा ३ का प्रकृति पुन पहिलो, पुरुषोत्तम आधारभूतको कक्षा ५ का बिजय बिक दोस्रो, मालिका आधारभूत बाइन्दफाँटको कक्षा ५ का संगम दर्जी तेस्रो र जनप्रिय माविको कक्षा ४ का समित नेपाली सान्तवना हुनुभएको छ ।
६–८ तहका विद्यार्थीहरुबीच भएको ‘सम्बृद्ध नेपालको आधार, सुनिश्चत बाल अधिकार’ शिर्षकमा भएको वक्तृत्वकला प्रतियोगितामा १४ विद्यालयले सहभागिता जनाएका थिए । उउक्त प्रतियोगितामा सिद्ध आधारभूत निस्कोट खहरेकी कक्षा ८ की कृष्णकुमारी पुन पहिलो, गौबमोमबस्त माविकी कक्षा ८ की तारादेवी सुनार दोस्रो, जनप्रिय माविको कक्षा ८ का सागर सुवेदी तेस्रो र राष्ट्रिय मावि रुमको कक्षा ८ का तिलक रसाईली सान्तवना हुनुभएको थियो ।
चित्रकला र वक्तृत्वकलामा पहिलो, दोस्रो, तेस्रो र सान्तवना हुनेलाई प्रमाणपत्र र क्रमश नगद रु. पाँच हजार, तीन हजार पाँच सय, दुई हजार पाँच सय र एक हजार पाँच सय पुरस्कार प्रदान गरिएको थियो ।
१० वटा विद्यालयले सहभागिता जनाएको कक्षा ९ र १० को मावि स्तरीय हाजिरी जवाफ प्रतियोगितामा किसानी मावि बिम पहिलो, जनप्रिय मावि दोस्रो, सिद्धार्थ मावि च्युरीबोट तेस्रो र केबी एकेडेमी सान्तवना भएका थिए । पहिलो, दोस्रो, तेस्रो र सान्तवनालाई प्रमाणपत्र सहित क्रमश रु. १२ हजार, नौ हजार, सात हजार र पाँच हजार नगद पुरस्कार वितरण गरिएको थियो ।
मालिका गाउँपालिकाको सामाजिक विकास समितिका संयोजक तथा वडा नं. –१ निस्कोटका वडा अध्यक्ष टंकप्रसाद पुनको अध्यक्षतामा भएको कार्यक्रममा प्रमुख प्रशासकीय अधिकृत हरिशचन्द्र ढकालले बालबालिकाको प्रतिभा पहिचान, प्रस्फुटनका साथै शैक्षिक गुणस्तर र सिकाई उपलब्धी वृद्धिका लागि अतिरिक्त क्रियाकलाप आवश्यक रहेको बताउनुभयो ।
जनप्रिय माविका प्रअ दिवाकर सुवेदीको स्वागत, सहायक प्रअ नगेन्द्रबहादुर खत्रीको सञ्चालनमा सम्पन्न कार्यक्रममा शिक्षा अधिकृत रिजालले कार्यक्रमको उद्देश्यका बारेमा प्रकाश पार्नुभएको थियो । कार्यक्रममा मालिका गाउँपालिकाका सूचना प्रबिधि अधिकृत शुशिल गर्बुजा, रोजगार संयोजक सावित्रि गर्बुजा, महिला तथा बालबालिका शाखाका सरिता पौडल र शिक्षा शाखाका प्राबिधिक सहायक सुन्दरबहादुर खत्रीको पनि उपस्थिति थियो ।
