बेनी, १३ माघ ः म्याग्दीको अन्नपूर्ण गाउँपालिका–४ नारच्याङमा रहेको अन्नपूर्ण आधार शिविर र मौरिस हर्गोज पदमार्गमा रु. एक करोड २५ लाखको लागतमा पूर्वाधार निर्माण थालिएको छ ।
अन्नपूर्ण गाउँपालिकाको रु. एक करोड, नेपाल पर्यटन वोर्डको रु. २० लाख र अन्नपूूर्ण संरक्षण क्षेत्र आयोजना (एक्याप)को रु. पाँच लाख बजेटबाट आश्रयस्थल, शौचालय, खानेपानी, पदमार्ग, चिया पसल र खुल्ला संग्राहलय निर्माण थालिएको हो । अन्नपूर्ण गाउँपालिकाका अध्यक्ष भारतकुमार पुनले अन्नपूर्ण आधार शिविर र पञ्चकुुण्ड ताल क्षेत्रमा अस्थायी संरचना निर्माण गर्न लागिएको जानकारी दिनुभयो ।
“अन्नपूर्ण संरक्षण क्षेत्र आयोजना (एक्याप)मा पर्ने भएकाले स्थायी संरचना निर्माण गर्न नीतिगत समस्या भएपछि पर्यटकको सहजताका लागि अस्थायी संरचना बनाउन थालिएको हो,” उहाँले भन्नुभयो “अन्नपूर्ण आधार शिविर र पदमार्गमा चिया तथा खाजा पसल सञ्चालनको गाउँपालिकाले ठेक्का आव्हान गरेको छ ।”
योजनाको सर्वेक्षण, लागत अनुमान तयार, उपभोक्ता समिति गठन भइ र सम्झौता गरेको अन्नपूूर्णका प्रमुख प्रशासकीय अधिकृत रामप्रसाद शर्मा कडेलले बताउनुभयो । सन्धीखर्क, भुसकेट, पञ्चकुण्ड ताल परिसरमा रु. ४० लाखको लागतमा तीन वटा आश्रयस्थल निर्माण गर्न लागिएको छ ।
हुमखोला, फुतफुते झरना, गुुफाफाट, भुसकेट र पञ्चकुण्डमा खानेपानी र शौचालय निर्माणका लागि रु ३० लाख बिनियोजन भएको छ । फुटफुते झरना परिसरमा चिया पसल र आधार शिविरमा खुल्ला संग्राहलय निर्माणका लागि रु. १०÷१० लाख बिनियोजन भएको छ । खुल्ला संग्राहलयमा आधार शिविरमा रहेका अभिलेखहरुलाई संकलन र संरक्षण गर्ने लक्ष्य रहेको अन्नपूर्ण गाउँपालिकाका सवईञ्जिनियर बालकृष्ण पौडेलले बताउनुभयो ।
पदमार्ग निर्माण र सुधारका लागि पर्यटन बोर्डको रु. २० लाख, गाउँपालिकाको रु. १० लाख र एक्यापको रु. पाँच लाख बजेट परिचालन गर्ने गरि उपभोक्ता समिति गठन भएको छ । प्रमुख प्रशासकीय अधिकृत कडेल, सव ईञ्जिनियर पौडेल र समुन्त यादवको टोली गत हप्ता आधार शिविर पुुगेर योजना निर्माण स्थलको निरिक्षण गरेर फर्किएको थियो ।
मानव वस्ती देखि टाढा, होटल र रेष्टुरेन्ट नभएको आठ हजार ९१ मिटर अग्लो अन्नपूर्ण हिमालको आरोहण आधार शिविर जाने पर्यटकहरुलाई खाना, बस्न र फोहोर ब्यवस्थापनमा समस्या भएपछि पूर्वाधार निर्माण थालिएको हो । हाल हुुमखोला, गुफाफाट, भुसकेट र पञ्चकुण्ड ताल परिसरमा रहेको आश्रयस्थलको क्षमता कम भएकाले पर्यटकलाई बास बस्नको समस्या छ ।
गत वर्ष बेग घर भई हाल अस्टे«लीयामा रहेकी ललीता शेरपुञ्जाको अगुवाईमा फुुतफुते झरना नजिकै शौचालय निर्माण भएको थियो । एक्यापले भुसकेतमा चर्पी बनाएको थियो । पञ्चकुण्ड ताल नजिकैको शौचालय प्रयोग गर्न नमिल्ने भएको छ । शौचालय र खानेपानीको असुविधाले फोहोरको समस्या बढेको छ । पर्यटकहरुले आफै खानेबस्ने सामान लिएर जानुुपर्छ ।
अन्नपूर्ण गाउँपालिका–४ का वडा अध्यक्ष लोकबहादुर फगामीका अनुसार दसै–तिहारको समयमा करिब पाँच हजार जना आन्तरिक पर्यटकहरु अन्नपूर्ण आधार शिविरको भ्रमणमा गएका थिए । मौरिस हर्गोज पदमार्गमा झोलुङ्गे पुुल, सञ्चार, विद्युुत सुविधा विस्तार र पर्यटक चेक पोष्ट राख्नका लागि पनि पहल भएको उहाँले बताउनुभयो ।
अन्नपूर्ण र निलगिरि हिमालको फेदीबाट बग्ने मिस्त्रीखोलाको किनारै किनार, अग्ला झरना, मनमोहक हिमशृङ्खला, अनौठो भूगोल, पहाड, दुर्लभ वनस्पति, वन्यजन्तुको अवलोकन गर्दै आधार शिविर पुग्न सकिन्छ । अन्नपूर्ण हिमालको फेदीमा रहेको निलो रङगको पञ्चकुण्ड ताल आधार शिविरको आकर्षण हो ।
तीन दिनको छोटो अवधीमा साहासिक पदयात्रा गर्न सकिने भएकाले पर्यटकको रोजाईमा अन्नपूर्ण आधार शिविर परेको हो । हर्जोगको टोलीले अन्नपूर्ण चढ्न प्रयोग गरेको बाटो पछ्याउदै नारच्याङका तेज गुरुङको अगुवाईमा विसं २०६८ मा अन्नपूर्ण हिमाल र आधार शिविर म्याग्दीमा पर्ने तथ्य तथा पदमार्ग पहिचान भएको थियो ।
सो पदमार्गलाई अन्नपूर्ण गाउँपालिकाले ‘मौरिस हर्जोग’ नामाकरण गरेको छ । नारच्याङ देखि हुमखोला सम्म २० किलोमिटर सडक र हुमखोला देखि आधार शिविर सम्म आधारभूत स्तरको २२ किलोमिटर पदमार्ग तयार भएको छ । अस्थायी संरचना बनाएर पर्यटकलाई खाजा, खाना खाने र बास बस्ने सुविधा दिन लागिएको अन्नपूर्ण–४ का वडा सदस्य श्याम पुर्जाले बताउनुभयो ।
