पुरुषतर्फ बेनी र मालिका, महिलामा अन्नपूर्ण र मङ्गला फाइनलमा
बेनी । बेनीमा जारी आठौ म्याग्दी महोत्सवमा सञ्चालित पुरुष र महिला भलिबल प्रतियोगिताको सेमिफाइनल चरणको खेल सकिएको छ ।
सात वटा स्थानीय तहले सहभागिता जनाएको पालिका स्तरीय पुरुष भलिबलको फाइनलमा बेनी नगरपालिका र मालिका गाउँपालिकाले प्रतिस्पर्धा गर्ने भएका छन् । अन्नपूर्ण गाउँपालिका र मालिका युवा क्लव मङ्गलाको टोली छ टिम सहभागी खुल्ला महिला भलिबल प्रतियोगिताको फाइनलमा पुगेका छन् ।
बेनीको खुल्ला मञ्च खेलमैदानमा मङ्गलबार बिहान ८ बजे महिला र १० बजे पुरुष भलिबल प्रतियोगिताको फाइनल प्रतिस्पर्धा हुने जिल्ला भलिबल संघ म्याग्दीका अध्यक्ष तेजेन्द्र बानियाले जानकारी दिनुभयो । म्याग्दी उद्योग वाणिज्य संघले जिल्ला खेलकुद विकास समितिको समन्वय र भलिबल संघको प्राविधिक सहयोगमा पुरुष तथा महिला भलिबल प्रतियोगिता सञ्चालन गरेको हो ।
सोमबार भएको सेमीफाइनलमा अन्नपूर्ण गाउँपालिकाले जिल्ला खेलकुद विकास समिति बागलुङ र मालिका युवा क्लव सहश्रधाराले हिमालयन स्पाइक्सलाई सोझो तीन सेटमा पराजित गर्दै फाइनलको यात्रा तय गरेका हुन् ।
पुरुष भलिबलमा अन्नपूर्ण गाउँपालिकालाई एकका विरुद्ध तीन सेटले पछि पार्दै बेनी नगरपालिका र मङ्गला गाउँपालिकालाई सोझो तीन सेटमा पराजित गरेको मालिका गाउँपालिका फाइनल प्रवेश गरेका हुन् ।
पुरुषतर्फ बिजेता र उपबिजेतालाई ट्रफी, मेडल र प्रमाणपत्र सहित नगद रु. एक लाख ५१ हजार एक सय र रु. ७५ हजार एक सय प्रदान गरिने प्रतियोगिता संयोजक तारानाथ रेग्मीले जानकारी दिनुभयो ।
यसैगरी उत्कृष्ट खेलाडीलाई रु. तीन हजार, स्पाइकर, ब्लकर र सेटरलाई रु. दुई हजार पाँच सयका दरले पुुरस्कृत गरिने भएको छ । सेमि फाइनलबाट बाहिरिएका टिमले रु. २१ हजार एक सय पाएका छन् ।
महिला भलिबलको बिजेता र उपबिजेतालाई ट्रफी, मेडल र प्रमाणपत्र सहित रु. ७५ हजार एक सय र रु. ४० हजार एक सय पुुरस्कार प्रदान गरिने भएको छ । उत्कृष्ट खेलाडीलाई रु. दुई हजार पाँच सय, उत्कृष्ट स्पाइकर, ब्लकर र सेटरलाई रु. एक हजार पाँच सयका दरले पुरस्कार प्रदान गरिने म्याग्दी उद्योग वाणिज्य संघका अध्यक्ष सुविन श्रेष्ठले बताउनुभयो ।
