बेनी । म्याग्दीको बेनी नगरपालिका–१ मा यही माघ १५ देखि १९ गतेसम्म सञ्चालन हुने चौथो रत्नेचौर जागरण कपको ट्रफी आइतबार सार्वजनिक गरिएको छ ।
रत्नेचौर जागरण समूहले आयोजना गरेको प्रतियोगिताको पुर्व प्रतिनिधीसभा सदस्य भूपेन्द्रबहादुर थापाले ट्रफी सार्वजनिक गर्नुभयो । उहाँले खेलकुदको माध्यमबाट रत्नेचौरको पर्यटन प्रर्वद्धन र प्रचारप्रसारका लागि सहयोग पुग्ने विश्वास गर्नुभयो ।
समूहका अध्यक्ष खमबहादुर पुनको अध्यक्षता, उपाध्यक्ष दानबहादुर महतको स्वागत र समूहका सचिव हरीबहादुर महतको सञ्चालनमा भएको कार्यक्रममा वडा अध्यक्ष टेकबहादुर थापा, पुर्व जिविस उपसभापति एकेन्द्रबहादुर रावल, पुर्व गाविस अध्यक्ष नेत्रबहादुर महत, पुर्व वडा अध्यक्ष टेकबहादुर रावलले मन्तब्य व्यक्त गर्नुभएको थियो ।
समूहका संस्थापक अध्यक्ष गणेश बहादुर बोगटी, भानु माविको ब्यवस्थापन समितिका अध्यक्ष श्याम रोका, समूहका निवर्तमान अध्यक्ष मन्नु रावल, रत्नेचौर युवा क्लवका अध्यक्ष हिराबहादुर बोगटीको उपस्थिति थियो । रत्नेचौरका अगुवा, आमा समूह, टोल विकास संस्थाहरुको पनि उपस्थिति थियो ।
सो अवसरमा हुने खुल्ला÷पालिका÷वडा स्तरीय पुरुष भलिबल प्रतियोगिताको बिजेता र उपबिजेतालाई ट्रफी, मेडल र प्रमाणपत्र सहित रु. एक लाख एक हजार एक सय एघार र रु. ५१ हजार एक सय ११ पुरस्कार प्रदान गरिने भएको छ । एकल नृत्य प्रतियोगिताको बिजेतालाई रु. पाँच हजार र छेलो फाल्ने प्रतियोगिताको बिजेतालाई रु. पाँच हजार पुरस्कार प्रदान गरिने समूहका सदस्य अमर बोगटीले बताउनुभयो ।
पुरुष भलिबलको प्रथम पुरस्कारको प्रायोजन स्व. खड्गबहादुर पुनको स्मृतिमा उहाँका परिवारले गर्नुभएको छ भने दृतीय पुरस्कारको प्रयोजन हाल मलेसीयामा रहेका बिष्णु बोगटीले गर्नुभएको छ । एकल नृत्यको पुरस्कार प्रयोजन ई. टिकाबहादुर थापा र छेलो फाल्ने प्रतियोगिताको प्रथम पुरस्कार प्रयोजन कुमार पुनले गर्नुभएको छ ।
तोरी फुलेर मनमोहक बनेको रत्नेचौर पृष्ठभूमिमा देखिने धौलागिरी हिमालको दृष्य अवलोकनका लागि पछिल्लो समय पर्यटकको गन्तब्य बनेको छ । रत्नेचौरको श्रीहरी मन्दिर र कुडुले जोड्ने लामो झोलुङ्गे पुल पनि रत्नेचौरको अर्को आकर्षण हो ।
