बेनी, । बेनीमा शुक्रबार देखि वडा स्तरीय २० वर्ष मुनीका खेलाडीहरुबीचको बास्केटबल प्रतियोगिता शुरु भएको छ । म्याग्दी उद्योग वाणिज्य संघको मुल आयोजनामा बेनीमा जारी आठौ म्याग्दी महोत्सव, माघे संक्रान्ति एवम् प्रदेश स्तरीय कृषि, पर्यटन, औद्योगिक, ब्यापारिक मेला अन्तर्गत वास्केटबल प्रतियोगिता सञ्चालन भएको हो ।
जिल्ला खेलकुद विकास समिति र बास्केटबल संघ म्याग्दीको समन्वयमा कालिपुल खेलमैदानमा प्रतियोगिता शुरु भएको म्याग्दी उद्योग वाणिज्य संघका अध्यक्ष सुविन श्रेष्ठले जानकारी दिनुभयो । प्रतियोगितामा १० वटा समूहले सहभागिता जनाएका छन् ।
प्रतियोगितामा बिजेता र उपबिजेतालाई मेडल, ट्रफी र प्रमाणपत्र सहित क्रमश रु. ५५ हजार एक सय र ३१ हजार एक सय प्रदान गरिने जिल्ला बास्केटबल संघ म्याग्दीका अध्यक्ष एकिन गर्बुजाले बताउनुभयो ।
आठौ म्याग्दी महोत्सव अन्तर्गत बिहिबारदेखि बेनीमा पालिका स्तरीय पुरुष भलिबल प्रतियोगिता शुरु भएको थियो । आइतबारदेखि खुल्ला महिला भलिबल प्रतियोगिता पनि सञ्चालन हुने म्याग्दी महोत्सवका खेलकुद संयोजक तारानाथ रेग्मीले बताउनुभयो ।
पुरुष भलिबलमा बिजेता र उपबिजेतालाई ट्रफी, मेडल र प्रमाणपत्र सहित नगद रु. एक लाख ५१ हजार एक सय र रु. ७५ हजार एक सय प्रदान गरिने भएको छ । महिला भलिबलको बिजेता र उपबिजेतालाई ट्रफी, मेडल र प्रमाणपत्र सहित रु. ७५ हजार एक सय र रु. ४० हजार एक सय पुुरस्कार प्रदान गरिने भएको छ ।
पुुष २८ गतेदेखि शुरु भएको महोत्सव माघ ८ गतेसम्म सञ्चालन हुने जनाइएको छ । कला र संस्कृतिको संरक्षण, ब्यापार ब्यवसाय र पर्यटन प्रर्वद्धन गर्ने उद्देश्यले महोत्सव आयोजना गरिएको म्याग्दी उद्योग वाणिज्य बरिष्ठ उपाध्यक्ष राजेश शाक्यले बताउनुभयो ।
महोत्सवमा स्थानीय कृषि, पशुजन्य, घरेलु उद्योग सहित दुई सय ३० वटा स्टल रहेका छन् । म्याग्दीको पर्यटन, कृषि, जलविद्युत, खनिज, वन पैदावारजन्य उद्योग ब्यवसायमा लगानी भित्र्याउन, संस्कृति संरक्षण, प्रतिभा पहिचान, प्रर्वद्धन र खेलकुदलाई पनि महोत्सवसँग जोडिएको छ ।
स्थानीय, राष्ट्रिय, अन्तराष्ट्रिय औद्योगिक, कृषि तथा पशुजन्य उत्पादनको प्रर्दशनी, पुरुष–महिला भलिबल, बास्केटबल, लोक दोहोरी गित, कलाकारहरुको प्रस्तुति महोत्सवका आकर्षक रहेका छन् । पुख्र्योली नाच, रत्यौली गित, भजन, म्याग्दी आईडल एकल लोकनृत्य, जनजातीको भाँकी प्रर्दशनी पनि आयोजना गरिएको छ ।
