बेनी, । बेनीमा बिहिबारदेखि पालिका स्तरीय पुरुष भलिबल प्रतियोगिता शुरु भएको छ ।
आठौ म्याग्दी महोत्सव, माघे संक्रान्ति एवम् प्रदेश स्तरीय कृषि, पर्यटन, औद्योगिक, व्यापार मेला –२०८१ को अवसरमा प्रतियोगिता आयोजना गरिएको हो । म्याग्दी उद्योग वाणिज्य संघको आयोजना, जिल्ला खेलकुद विकास समितिको सहआयोजना र जिल्ला भलिबल संघको प्राविधिक सहयोगमा शुरु भएको प्रतियोगितामा सात वटा स्थानीय तहले सहभागिता जनाएका छन् ।
बिजेता र उपबिजेतालाई ट्रफी, मेडल र प्रमाणपत्र सहित नगद रु. एक लाख ५१ हजार एक सय र रु. ७५ हजार एक सय प्रदान गरिने प्रतियोगिता संयोजक तारानाथ रेग्मीले जानकारी दिनुभयो ।
यसैगरी उत्कृष्ट खेलाडीलाई रु. तीन हजार, स्पाइकर, ब्लकर र सेटरलाई रु. दुई हजार पाँच सयका दरले पुुरस्कृत गरिने भएको छ । सेमि फाइनलबाट बाहिरिने टिमले रु. २१ हजार एक सय पुुरस्कार पाउने भएका छन् ।
उद्घाटन खेलमा मालिका गाउँपालिकाले धवलागिरी गाउँपालिकालाई दुईका विरुद्ध तीन सेटले पराजित गरेको छ । गलकोट नगरपालिका समयमा उपस्थित नभएपछि उसको प्रतिस्पर्धी बेनी नगरपालिका सिधै सेमी फाइनल पुुगेको जिल्ला भलिबल संघका अध्यक्ष तेजेन्द्र बानियाले जानकारी दिनुभयो ।
जिल्ला समन्वय समिति म्याग्दीका प्रमुख राजकुमार थापाले प्रतियोगिताको उद्घाटन गर्नुभयो । शुक्रबारको पहिलो खेल रघुगङ्गा र मङ्गला गाउँपालिका र दोस्रो खेल अन्नपूर्ण र जलजला गाउँपालिकाबीच हुने बानियाले बताउनुभयो । महोत्सवको अवसरमा आयोजित खुल्ला महिला भलिबल प्रतियोगिता माघ ६ गते आइतबारदेखि शुरु हुने भएको छ । महिला भलिबलमा छ समुहले नाम दर्ता गराएका छन् ।
महिला भलिबलको बिजेता र उपबिजेतालाई ट्रफी, मेडल र प्रमाणपत्र सहित रु. ७५ हजार एक सय र रु. ४० हजार एक सय पुुरस्कार प्रदान गरिने भएको छ । उत्कृष्ट खेलाडीलाई रु. दुई हजार पाँच सय, उत्कृष्ट स्पाइकर, ब्लकर र सेटरलाई रु. एक हजार पाँच सयका दरले पुरस्कार प्रदान गरिने आयोजकले जनाएका छन् ।
पुुष २८ गतेदेखि शुरु भएको महोत्सव माघ ८ गतेसम्म सञ्चालन हुने जनाइएको छ । कला र संस्कृतिको संरक्षण, ब्यापार ब्यवसाय र पर्यटन प्रर्वद्धन गर्ने उद्देश्यले महोत्सव आयोजना गरिएको म्याग्दी उद्योग वाणिज्य संघका अध्यक्ष सुविन श्रेष्ठले बताउनुभयो ।
महोत्सवमा स्थानीय कृषि, पशुजन्य, घरेलु उद्योग सहित दुई सय ३० वटा स्टल रहेका छन् । म्याग्दीको पर्यटन, कृषि, जलविद्युत, खनिज, वन पैदावारजन्य उद्योग ब्यवसायमा लगानी भित्र्याउन, संस्कृति संरक्षण, प्रतिभा पहिचान, प्रर्वद्धन र खेलकुदलाई पनि महोत्सवसँग जोडिएको छ ।
स्थानीय, राष्ट्रिय, अन्तराष्ट्रिय औद्योगिक, कृषि तथा पशुजन्य उत्पादनको प्रर्दशनी, पुरुष–महिला भलिबल, बास्केटबल, लोक दोहोरी गित, कलाकारहरुको प्रस्तुति महोत्सवका आकर्षक रहेका छन् । पुख्र्योली नाच, रत्यौली गित, भजन, म्याग्दी आईडल एकल लोकनृत्य, जनजातीको भाँकी प्रर्दशनी पनि आयोजना गरिएको छ ।
