बेनी, सरकारको नेतृत्व गरेको दल नेकपा एमालेका उपमहासचिव प्रदिप ज्ञवालीले सत्य निरुपण तथा मेलमिलाप र वेपत्ता छानविन आयोग गठनको अन्तिम तयारीमा सरकार रहेको बताउनुभएको छ ।
प्रेस चौतारी नेपाल जिल्ला शाखा म्याग्दीले शुक्रबार दिउँसो बेनीमा आयोजना गरेको पत्रकार भेटघाटमा नेता ज्ञवालीले राजनीतिक सहमतिको आधारमा निर्माण भएको सत्य निरुपण तथा मेलमिलाप र वेपत्ता छानविन सम्बन्धी ऐन कार्यान्वयनका लागि आयोगको पदाधीकारी चयनको प्रक्रिया अन्तिम चरणमा पुगेको जानकारी दिनुभयो ।
“सिफारिस समितिले आयोगका पदाधीकारीको छनौट गरेर सूची सार्वजनिक गर्ने र आज भोलीनै आयोग गठन गर्ने सरकारको तयारी छ,” उहाँले भन्नुभयो “आयोग गठन भएपछि २० वर्षदेखि थाति रहेको शान्ति प्रक्रीयाको बाँकी कामले पूर्णता, पिडितले न्याय र पिडकले सजाय पाउनेछन् ।”
नेता ज्ञवालीले सरकारले सहकारी संस्थामा देखिएको समस्या समाधानका लागि शक्तिशाली नियमनकारी निकायको गठन र बचतको सुरक्षाका लागि कर्जा सुुरक्षण कोष बनाउने तयारी सरकारले गरेको जानकारी दिनुभयो ।
“सहकारी संस्थामा विकृति र बेतिथि मौलाएको महशुस गरेर नियमनकारी निकाय बनाउने तयारीसँगै र जोखिममा परेको बचतलाई फिर्ता गराउने काममा सरकारले प्राथमिकता दिएको छ,” उहाँले भन्नुभयो “सहकारीको बचत अपचलनमा जोडिएका जोसुकैलाई पनि सरकारले अनुसन्धानको दायरामा ल्याउँछ । दोषी देखिए कारबाही हुन्छ ।”
कानुन कार्यान्वयन गर्ने निकायहरुलाई स्वतन्त्र दंगले काम गर्ने दिनुपर्ने बताउदै उहाँले सडक र भिड जम्मा गरेर फैसला नहुने बताउनुभयो । सरकारले विश्वका सबै देशहरुसँग सन्तुलित सम्बन्ध स्थापित गराउने प्रयास गरेको ज्ञवालीले बताउनुभयो ।
प्रधानमन्त्रीको यसै हप्ता भएको चिन भ्रमणले सात वर्षअघि भएको बिआरआई सम्झौता कार्यान्वयनमा अघि बढेको बताउनुभयो । राजनीतिक अस्थिरता र अराजकताको अन्त्यका लागि काँग्रेस र एमालेबीच सत्ता सहकार्य भएको नेता ज्ञवालीले बताउनुभयो ।
