बेनी, । पर्वतको जलजला गाउँपालिका–८ फर्सीमा रहेको शिव माविका पुर्व प्रअ रत्नबहादुर केसीको बुधबार सम्मान सहित बिदाई गरिएको छ ।
२३ वर्ष शिव माविको प्रअको जिम्मेवारी सम्हाल्नुभएका केसीलाई व्यवस्थापन समिति, शिक्षक, अभिभावक, विद्यार्थी र आमा समूहले सम्मान गरेका हुन् । विद्यालयमा अभिनन्दन सहित केसीको बिदाई गरिएको थियो ।
३१ वर्ष शिक्षण पेशामा बिताएका केसीले स्वेच्छिक अवकाश लिनुभएको हो । उहाँले जलजला–८ लुप्राङको तत्कालीन अनोथदय प्रा.बि.मा तीन वर्ष अध्यापन गराउनुभएको थियो । सोही विद्यालयमा अध्यापन गर्ने क्रममा स्थायी नियुक्ती हुनुभएको थियो ।
विद्यालय र समाजको शैक्षिक विकासमा योगदान गरेवापत केसीलाई अभिनन्दन सहित बिदाई गरिएको जनाइएको छ । बिदाई कार्यक्रममा केसीले आफ्नो अनुभव सुनाउनुभएको थियो भने अन्य बक्ताहरुले उहाँको योगदानको चर्चा गरेका थिए ।
वडा अध्यक्ष हरिबिकास जिसी र विद्यालय व्यवस्थापन समितिका अध्यक्ष बिप्लप हमाल लगायतले सदाशयी, शान्त स्वभावका केसीले सदैव शिक्षाको प्रगति र सुधारका लागि समर्पित भएर योगदान गरेको बताउनुभयो ।
