बेनी, प्रकाश मावीले बेनी नगरपालिका स्तरीय राष्ट्रपति रनिङ्ग शिल्ड खेलकुद प्रतियोगितामा च्याम्पीयन भएको छ । प्रकाश माविले लगातार तेस्रो पटक रनिंग शिल्ड जितेर पच गरेको छ ।
बेनीको खुल्ला मञ्च खेलमैदानमा शनिबार सम्पन्न पाँचौ नगर स्तरीय प्रतियोगितामा न्यु वेष्ट पोइन्ट आवासीय मावि दृतीय र माउन्ट एभरेष्ट आवासीय मावि तृतीय भए । प्रकाश माविले यसअघिका दुई वर्षपनि लगातार प्रतियोगिता जितेको थियो ।
१३÷ १३ स्वर्ण र रजत तथा एक वटा कास्य पदक सहित प्रकाश मावि लगातार दोस्रो पटक बिजेता हुँदा १३ स्वर्ण, छ रजत र १४ कास्य पदक जितेको वेष्ट पोइन्टले उपबिजेतामा चित्त बुझायो ।
तेस्रो भएको माउन्टले पाँच स्वर्ण, दुई रजत र छ कास्य पदक जितेको छ । तीन दिनसम्म सञ्चालन भएको प्रतियोगितामा २६ वटा विद्यालय सहभागि थिए । एथलेटिक्स, भलिबल, कवड्डी र मार्शल आर्ट बिधाका ४० वटा खेलमा प्रतिस्पर्धा भएको थियो ।
बिजेता विद्यालयले रु. ५१ हजार नगद सहित राष्ट्रपति रनिङ्ग शिल्ड र ट्रफी प्राप्त गरेको छ । दोस्रोलाई रु. ४० हजार र तेस्रोलाई रु. ३० हजार नगद सहित ट्रफी प्रदान गरिएको बेनी नगरपालिकाका शिक्षा शाखाका अधिकृत कमलप्रसाद ढकालले जानकारी दिनुभयो ।
बेनी नगरपालिकाका प्रमुख सुरत केसी, प्रमुख प्रशासकीय अधिकृत अर्जुन शर्मा, शिक्षा शाखाका उपसचिव हेमचन्द्र पौडेलले बिजेता विद्यालय तथा खेलाडीहरुलाई प्रमाणपत्र, मेडल र पुरस्कार वितरण गर्नुभएको थियो ।
