बेनी, बेनी–जोमसोम सडक सोमबार साँझदेखि अवरुद्ध बनेको छ ।
म्याग्दीको रघुगङ्गा गाउँपालिकाको बैसरी र अन्नपूर्ण गाउँपालिकाको महभिरमा पहिरो खसेका कारण सडक अवरुद्ध बनेको जिल्ला ट्राफ्रिक प्रहरी कार्यालयले जनाएको छ । कार्यालयका प्रमुख प्रहरी राजकुमार केसीले सोमबार दिउँसोदेखिको बर्षातका कारण सडकमा पहिरो खसेर सवारी साधन आवत जावत रोकिएको जानकारी दिनुभयो ।
बर्षा नरोकिएको, रात परिससकेको र निरन्तर पहिरो खसिरहेकाले रातको समयमा बेनी–जोमसोम सडकमा यात्रा नगर्न उहाँले आग्रह गर्नुभयो । बेनी–जोमसोम–कोरला सडक आयोजनासँग समन्वय गरेर मङगलबार बिहानैदेखि पहिरो पन्छाएर सडक सूचारु गराउन पहल गरिने ट्राफिक प्रहरी कार्यालयका प्रमुख केसीले बताउनुभयो ।
सडक अवरुद्ध हुदा म्याग्दीको रघुगङ्गा, अन्नपूर्ण गाउँपालिका र मुस्ताङका बासिन्दाका साथै घुम्न आएका पर्यटकहरु बिचबाटोमै रोकिएका छन् । मुस्ताङतर्फ जाने सवारी साधनहरु बेनी र म्याग्दीतर्फ आउने सवारी साधनहरु भुरुङ्ग–तातोपानीतर्फ फर्किएका छन् ।
