बेनी, मुस्ताङ मा शुक्रबारदेखि पर्वतीय कला महोत्सव शुरु भएको छ ।
कात्तिक ८ गतेसम्म मुस्ताङका विभिन्न ठाउँमा सञ्चालन हुने महोत्सवमा सहभागी हुन नेपाल सहित विभिन्न सात वटा राष्ट्रका चित्रकारहरु आएका छन् । प्रथम अन्तर्राष्ट्रिय पर्वतीय कला महोत्सवका संयोजक त्रिपल पि गुरुङले परम्परागत सङ्गीत, नृत्य र सांस्कृतिक परम्परालाई चित्रकार माझ बाँड्ने र पर्यटन प्रवर्धन गर्ने उद्देश्यले महोत्सव आयोजना गरिएको जानकारी दिनुभयो ।
“महोत्सवमा सहभागी चित्रकारहरुले जोमसोम, ठिनी, कागबेनी, मुक्तिनाथ, झोङ, झारकोट, तिरी लगायत ठाउँको अवलोकन गर्दै चित्र कोर्नुहुन्छ,” उहाँले भन्नुभयो “मुस्ताङको पारम्पारिक संगीत, नृत्य र विभिन्न सांस्कृतिक परम्परालाई चित्र कला मार्फत विश्वभर प्रचार गर्ने महोत्सवको उद्देश्य हो ।”
महोत्सवमा आउटडोर चित्रकला कार्यशालासँगै फोसिल हन्ट एन्ड स्टोन आर्ट, साउन्ड हिलिङलगायत विभिन्न सांस्कृतिक र साङ्गीतिक कार्यव्रmम गरिने जनाइएको छ । हरेक साँझ फरक फरक स्थानमा काठमाडौँ अन्तर्राष्ट्रिय पर्वतीय चलचित्र महोत्सव (किम्फ) को संयोजनमा घुम्ती रुपमा हिमाली क्षेत्रका चलचित्र प्रर्दशन गरिने संयोजक गुरुङले बताउनुभयो ।
महोत्सवमा सहभागी हुन थाइल्यान्डका डिरेक किङ्नक र काराज डब्लुएसपी, पोल्यान्डका इवा व्रmुएजकोस्का, रोमानियाका स्टेफन बालोग, भुटानका जामपेल छेदा, इन्डोनेसियाका एमी गोर, ताइवानका छेङ हान वेनलगायतका अन्तर्राष्ट्रिय चित्रकार मुस्ताङ आउनुभएको छ ।
नेपालका चित्रकार सिर्जन राजभण्डारी, एरिना ताम्राकार, हरेराम जोजु, एनबी गुरुङ, वाङ लामा, ध्वज गुरुङ, मनोज तामाङ, नवीन नाल्बो र आकाश गुरुङ पनि महोत्सवमा सहभागी हुनुुभएको छ ।
नेपाल पर्यटन वोर्ड प्रर्वद्धन साझेदार रहेको महोत्सवको प्रायेजक ओम्स होम, रेडहाउस र ठमेल भिल्ला होटलले गरेका छन् । युरोपियन युनियन, स्वीस सरकार विकास सहयोग एमडीसी, दलाई ला, यति एयरलाइन्स, शेर्पा बु्रअरी, हार्मोनिक लिबरेसन र होटल मस्याङ्दी सहयोगी रहेका छन् ।
