बेनी । पर्वतको जलजला गाउँपालिकाले टोल टोलमा पुगेर जेष्ठ नागरिकको स्वास्थ्य परिक्षण गर्न थालेको छ ।
जेष्ठ नागरिकको नसर्ने रोगको अवस्था पहिचान गरि परामर्श र उपचारमा सघाउने उद्देश्यले प्रत्येक दुई महिनामा हरेक टोलमा स्वास्थ्यकर्मी पुगेर जेष्ठ नागरिकको स्वास्थ्य परिक्षण गर्ने ब्यवस्था मिलाएको गाउँपालिकाले जनाएको छ ।
जलजला गाउँपालिकाका स्वास्थ्य शाखाका प्रमुख गणेश मल्लले ९० वटा टोलमा जेष्ठ नागरिकको स्वास्थ्य परिक्षण गर्न स्वास्थ्यकर्मी परिचालन गरेको बताउनुभयो । ६० वर्ष उमेर पुगेका जेष्ठ नागरिकको स्वास्थ्य समस्या र आवश्यकता पहिचान गरि सहायता सामग्री र औषधी सहयोग गरिने उहाँले बताउनुभयो ।
नियमित सेवन गर्ने औषधी, रक्तचाप, पिसाव परिक्षण, रगतमा गुल्कोजको मात्रा, पोषणको अवस्था, आँखा, कान, स्मरणशक्ति, गतिशिलता लगायतका विषयमा परिक्षण गर्न थालिएको स्वास्थ्य शाखा संयोजक मल्लले बताउनुभयो । जेष्ठ नागरिकको नसर्ने रोगको स्कृनिङ शिविरका लागि गाउँपालिकाले चालु आर्थिक वर्ष २०८१÷०८२ मा रु. छ लाख बजेट बिनियोजन गरेको छ ।
