लामाखेत । पर्वतको जलजला गाउँपालिकाले आर्थिक वर्ष २०८०÷०८१ मा सञ्चालित योजना तथा कार्यक्रम र सेवा प्रवाहका विषयमा मंगलबार लामाखेतमा समिक्षा गरेको छ ।
गाउँपालिका र मातहतका शाखा तथा वडा कार्यालयहरु मार्फत कार्यान्वयन भएका योजना तथा कार्यक्रमको उपलब्धी, समस्या र चुनौति तथा समाधानका उपायका विषयमा समिक्षाका साथै छलफल भएको हो ।
अघिल्लो आर्थिक वर्षमा भएका उपलब्धी सार्वजनिकरण, समस्याको पहिचान र समाधानका उपायका विषयमा कार्यक्रममा जनप्रतिनिधी तथा कर्मचारीहरुबीच छलफल भएको प्रमुख प्रशासकीय अधिकृत फणिन्द्रप्रसाद आचार्यले जानकारी दिनुभयो ।
गाउँपालिकाका उपाध्यक्ष दिपक आचार्य (आकाश)को अध्यक्षतामा भएको कार्यक्रमको सञ्चालन सूचना अधिकारी भेषनाथ आचार्यले गर्नुभएको थियो । जलजलामा पूर्वाधार निर्माण सम्बन्धी ३०० वटा योजनाहरु रहेकामा सबै कार्यान्वयन भएका थिए । सडक निर्माण, स्तरोन्नति, पदमार्ग, भवन, सिचाई, खानेपानी, खेलमैदान लगायतका आयोजनाहरु धेरै थिए ।
आर्थिक वर्षको पहिलो चौमासिकमै योजनाको सर्वेक्षण, लागत अनुमान तयार पार्ने र उपभोक्ता समिति गठन तथा ठेक्का प्रक्रीया अघि बढाएकाले लक्ष्य अनुसारनै योजना कार्यान्वयन भएको बताउदै यस वर्ष पनि शतप्रतिशत योजना कार्यान्वयन गर्ने तयारीमा लाग्न उपाध्यक्ष आचार्यले कर्मचारीहरुलाई निर्देशन दिनुभयो ।
गत वर्ष कुल रु. ४९ करोड ८५ लाख ४६ हजार ५४५ बजेट बिनियोजन भएकोमा रु. ४४ करोड ४७ लाख ८८ हजार ३६९ खर्च भएको थियो । लेखा शाखाका प्रमुख महेन्द्र सुवेदीका अनुसार पुजिगत शिर्षकमा रु. १३ करोड २३ लाख ८० हजार बिनियोजन भएकोमा रु. ११ करोड २४ लाख ९५ हजार ६७३ अथवा ८४.९८ प्रतिशत खर्च भएको छ ।
चालु शिर्षकमा बिनियोजन भएको रु. ३६ करोड ६१ लख ६६ हजार ४४५ मध्य ९०.७५ प्रतिशत अथवा रु. ३३ करोड २२ लाख ९२ हजार ६९६ खर्च भएको छ । खनियाघाट–डमुवाखोला–नाग्लीवाङ, मल्लाजमा अस्पताल भवन, गण्डकी गोपाल गौशाला, लामाखेतको आवास तथा भण्डारण भवन गत आर्थिक वर्षमा जलजला गाउँपालिकाले सञ्चालन गरेका प्राथमिकता प्राप्त आयोजनाहरु हुन् ।
गाउँपालिकाका ईञ्जिनियर सुनिल बानियाले गत वर्ष एक किलोमिटर दुई सय ४८ मिटर सडक आरसिसी र पिसिसी ढलान गरेर पक्कि बनाएको, तीन किलोमिटर सात सय ६० मिटर पदमार्ग निर्माण, छ सय असी मिटर सडकमा सोलिङ, १४ वटा सामुदायिक भवन, दुई वटा स्वास्थ्य चौकीको भवन, तीन सय ४५ मिटर सडक नाला र दुई सय ७० मिटर सिचाई नहर निर्माण भएको बताउनुभयो । एक किलोमिटर एक सय मिटर नयाँ सडकको मार्ग खोलेको छ ।
शिक्षा अधिकृत यज्ञप्रसाद लामिछानेले कक्षा १ देखि ८ सम्मको पाठ्यक्रम तयार भएको र छपाइको तयारी गरेको, कार्यसम्पादनका आधारमा छ वटा विद्यालयलाई अनुदान दिएको बताउनुभयो । स्वास्थ्य शाखाका प्रमुख गणेश मल्लले पूर्ण खोप सुनिश्चितता पालिका घोषणा भएको, सुत्केरीलाई घिउ र अण्डा वितरण गरिएको, बाँसखर्क, मल्लाज, नाग्लीवाङ स्वास्थ्य चौकीमा पोषण कर्नर स्थापना गरेको र एक सय ४९ जनालाई ग्रामिण अल्ट्रासाउण्ड सेवा उपलब्ध गराएको बताउनुभयो ।
कृषि शाखाका प्रमुख राजुप्रसाद गौतमले कृषकले उत्पादन गरेको आलुको विउ खरिद गरेको, टोल विकास संस्था मार्फत बिरुवा वितरण गरेर प्याज खेती प्रर्वद्धन गरेको र डमुवाखोलामा चिस्यानगृह बनाउने तयारी भएको जानकारी दिनुभयो ।
