बेनी । कृषि ज्ञान केन्द्र म्याग्दीबाट चालु आर्थिक वर्ष २०८१÷०८२ मा म्याग्दी जिल्लामा सञ्चालन गर्ने वार्षिक कार्यक्रम सार्वजनिक भएको छ । सोमबार सदरमुकाम बेनीमा एक समारोहको आयोजना गरी चालु वर्षमा सञ्चालन हुने कार्यक्रमसहित वार्षिक बजेट सार्वजनिकीकरण गरिएको हो ।
चालु वर्षमा कृषि ज्ञान केन्द्रले जिल्लाभर कुल तीन करोड ३३ लाख २५ हजार रुपैयाँको लागतमा कृषिसँग सम्बन्धित विभिन्न कार्यक्रमहरु सञ्चालन गर्ने जनाएको छ । सार्वजनिकीकरण कार्यक्रममा आफ्नो प्रस्तुती राख्दै केन्द्र प्रमुख सञ्जिव बाँस्तोलाले कृषि प्रसार तथा तालिम, समुदायस्तरमा प्रशोधनयोग्य खायन आलु प्रवद्र्धन, खाद्यान्न तथा तरकारी बाली प्रवद्र्धन, सुन्तलाजात फलफुल विकास आयोजनालगायत ६१ वटा कार्यक्रमहरु सञ्चालन हुने बताउनुभयो ।
यसैगरी कृषि तथ्याङ्क तथा बजार विकास, फलफुल बाली विकास, मसला तथा निर्यातयोग्य बाली प्रवद्र्धन, रैथाने बाली तथा जलवायुमैत्री प्रविधि प्रवद्र्धन र पोषण सुरक्षा कार्यक्रम रहेको केन्द्र प्रमुख बाँस्तोलाले जानकारी दिनुभयो । गएको आर्थिक वर्ष २०८०÷०८१ मा कृषि ज्ञान केन्द्र म्याग्दी र स्थानीय तहले जिल्लामा कुल १३ करोड ६४ लाख बढीको कार्यक्रम सञ्चालन गरेका थिए ।
गतवर्ष कृषि ज्ञान केन्द्रबाट खायन आलु प्रवद्र्धन कार्यक्रम, अगुवा तथा उत्कृष्ट किसानलाई पुरस्कृत, फलफुल तथा तरकारी खेतीमा सिँचाइ, ग्रामीण पोषण प्रवद्र्धन कार्यक्रम, धान दिवस मनाउनेलगायत विभिन्न कार्यक्रमहरु सञ्चालन गरिएको थियो ।
सोही कार्यक्रमको अवसरमा भेटेरिनरी अस्पताल तथा पशु सेवा विज्ञ केन्द्र म्याग्दीबाट गतवर्ष सञ्चालित र चालु वर्षमा सञ्चालन हुने कार्यक्रम तथा बजेट पनि सार्वजनिक भएको छ । विज्ञ केन्द्र प्रमुख डाक्टर भरत रेग्मीले गतवर्ष सञ्चालित कार्यक्रम तथा बजेट र चालु वर्षमा सञ्चालन हुने कार्यक्रमसहित बजेटको बारेमा आफ्नो प्रस्तुतीकरण गर्नुभएको थियो ।
सार्वजनिकीकरण कार्यक्रमको उद्घाटन गर्दै गण्डकी प्रदेश सभा सदस्य बिमला गौचनले कृषि क्षेत्रको विकास तथा प्रवद्र्धनमा राज्य लागिपरेको बताउनुभयो । उहाँले विभिन्न समस्याहरुको बाबजुद पनि कृषि र पशुपालनको विकासमा जोड दिइएको बताउँदै राज्यले कृषकहरुलाई लक्षित गरेर ल्याएका अनुदान, बजेट तथा कार्यक्रमहरुको पूर्ण रुपमा कार्यान्वयन हुनुपर्ने बताउनुभयो ।
कृषि र पशुपालनको विकास गर्न आफूले प्रदेश सरकारमा आवश्यक पहल गरिरहेको बताउँदै उहाँले म्याग्दीलाई आलु तथा टिम्मुरको पकेट क्षेत्र बनाउनुपर्नैमा जोड दिनुभयो ।सोही कार्यक्रममा अन्नपूर्ण गाउँपालिकाका अध्यक्ष भारतकुमार पुनले कृषि र पशुपालनको कार्यक्रममार्फत पर्याप्त मात्रामा जिल्लाका कृषकहरुलाई समेट्नुपर्ने बताउँदै कृषकलक्षित अनुदान तथा राहतको कार्यक्रममा जोड दिन आवश्यक रहेको बताउनुभयो ।
बेनी नगरपालिकाका नगर उपप्रमुख ज्योति लामिछानेले नगरपालिकामार्फत कृषि उत्पादन खरिद गर्नका लागि कृषि बजार स्थापना गर्न लागिएको बताउँदै कालीपुलमा कृषि भवन बनाउन लागिएको जानकारी दिनुभयो । उहाँले अहिले वडा कार्यालयसम्म सडक विस्तारको कार्यलाई जोड दिएको भन्दै ग्रामीण कृषि सडक स्तरोन्नति गर्न नगरपालिका लागिरहेको बताउनुभयो ।
कार्यक्रममा कृषकद्वय तिलकबहादुर गुरुङ र मुक्तिबहादुर खड्काले आ–आफ्नो धारणासहित जिज्ञासा राख्नुभएको थियो भने कृषि ज्ञान केन्द्र प्रमुख बाँस्तोला र विज्ञ केन्द्र प्रमुख डा. रेग्मीले जवाफ दिनुभएको थियो । कृषि ज्ञान केन्द्र प्रमुख बाँस्तोलाको अध्यक्षता र बाली संरक्षण अधिकृत प्रकाश पुनको सञ्चालनमा कार्यक्रम सम्पन्न भएको थियो ।
