![Add Samajik bikash office](https://dhaulagirikhabar.com/wp-content/uploads/2024/06/Add-Samajik-bikash-office-3.jpg)
बेनी, मुस्ताङको लोमान्थाङ गाउँपालिका–१ स्थित चिनको सिमाना कोरला नाकामा गण्डकी प्रदेश सरकारले सुरक्षा निकाय तथा उद्दार केन्द्रको भवन निर्माण गरेको छ ।
पूर्वाधार विकास कार्यालय मुस्ताङले एसवाई प्यानल प्रबिधिको ६ कोठे १ तले भवन निर्माण गरेको हो । कार्यालयका प्रमुख अजय श्रेष्ठले सुरक्षा निकाय र आपतकालिन अवस्थामा उद्धारका लागि भवन निर्माण गरिएको जानकारी दिनुभयो ।
“संरचना तयार भइसकेको भवन हस्तान्तरण र फर्निचर व्यवस्थापन भएपछि प्रयोगमा ल्याउन सकिन्छ,” उहाँले भन्नुभयो “भौगोलिक विकटता, प्रतिकुल वातावरणका बावजुद काम थालेको १ महिनामै भवन तयार भएको छ ।”
![Shreekrishna hardwear in news](https://dhaulagirikhabar.com/wp-content/uploads/2023/10/Shree-Krishna-Hardware.gif)
समुन्द्रि सतहदेखि ४ हजार मिटर भन्दा बढी उचाईमा रहेको कोरला नाकाको नेपालतर्फ भवन नहुँदा सुरक्षाकर्मी, भन्सारका कर्मचारी, ब्यवसायी र पर्यटकहरुलाई समस्या भएको थियो । नहुँदा चिसो बतास चल्ने सो ठाउँमा चिसोले ५ मिनेट टिक्न पनि मुस्किल पर्ने गरेको थियो ।
![Bhautik ministry notice about road](https://dhaulagirikhabar.com/wp-content/uploads/2023/10/Bhautik-ministry-notice-scaled.jpg)
भूकम्प प्रतिरोधात्मक र वातावरण अनुकुलित भवनमा भान्सा कोठा, बैठक हल र कार्यालय प्रयोजनका लागि ४ वटा कोठा बनाइएको पूर्वाधार विकास कार्यालयका सूचना अधिकारी घनश्याम रोकाले बताउनुभयो । रु. ४९ लाख ९९ हजार ४५० लागत अनुमान गरिएको भवन निर्माणका लागि २०८१ जेठ १३ गते काठमाडौको निमा निर्माण सेवासँग रु. ४० लाख २५ हजार ९९९ मा ठेक्का सम्झौता भएको थियो ।
२०८१ असार २३ गते सम्पन्न गर्ने लक्ष्य राखिएको थियो । बेनी–जोमसोम सडक अवरुद्ध हुनु, चिसो मौसम र कामदार अभावका कारण निर्धारित मितिमा निर्माण पुरा हुन नसकेको भवनको प्रमुख संरचनाहरु तयार भएको पूर्वाधार विकास कार्यालयका प्राविधिक शतिश पनेरुले बताउनुभयो ।
कोरला नाकामा नेपाली सुरक्षाकर्मी र भन्सारका कर्मचारीका लागि चिनले गत कात्तिकमा १० जना अटाउन सक्ने ४ वटा कन्टेनर उपलब्ध गराएको थियो । गत कात्तिक अन्तिम सातादेखि ४ वर्षपछि लोमान्थाङ र लोघेकर दामोदरकुण्ड गाउँपालिकाका बासिन्दाका लागि खुलाइएको कोरला नाकाको नेपालतर्फ भौतिक संरचना अभावमा ब्यापारी, स्थानीयबासी र पर्यटकलाई समस्या भएको लोमान्थाङका व्यवसायी टसी नर्बु गुरुङले बताउनुभयो ।
कोरलाबाट ल्याएको सामान जाँचपास गराउन १३ किलोमिटर तल नेचुङमा रहेको भन्सार कार्यालय र प्रहरी चेकपोष्टमा ल्याउने गरिएको छ । नाकामा खानेपानी, सञ्चार सुविधा र शौचालयको तत्कालै व्यवस्थापन गर्नुपर्ने लोमान्थाङ–१ छोसेरका छिरिङ ल्यामो गुरुङले बताउनुभयो ।
कोरलामा १० किलोमिटर तलबाट गाडीमा पिउने पानी ओसार्ने गरिएको छ । नेचुङमा सशस्त्र प्रहरी बलको (बिओपी)को भवन निर्माण भएको छ । जोमसोमदेखि कोरला नाकासम्म दुई लेनको कच्ची सडकको पहुँच पुगेको छ ।
![Gandaki dadelo notice](https://dhaulagirikhabar.com/wp-content/uploads/2023/05/Add-aantarik-mamila-upabhokta.jpg)