![Add Samajik bikash office](https://dhaulagirikhabar.com/wp-content/uploads/2024/06/Add-Samajik-bikash-office-3.jpg)
बेनी,
बेनी नगरपालिका ८ कालीपुलमा स्थानीय उत्पादनको बिक्री कक्ष (कोशेली घर) स्थापना भएको छ । कालीपुल म्याग्दी र मुस्ताङ भित्र्ने मुख्य नाका हो ।
जिल्लामा उत्पादन भएको कृषि, वन, पशुजन्य उत्पादनको बजारीकरण गर्ने उद्देश्यले म्याग्दी उद्योग वाणिज्य संघ र महिला उद्यम विकास समितिले बेनी नगरपालिकासँगको समन्वयमा बिक्री कक्ष सञ्चालन गरेका हुन् ।
![Shreekrishna hardwear in news](https://dhaulagirikhabar.com/wp-content/uploads/2023/10/Shree-Krishna-Hardware.gif)
कक्षमा म्याग्दीमा उत्पादन हुने सिमी, भागो, आलु, टिम्मुर, अल्लो र ढाकाका कपडा, मुडा, मह, मकै, अचार, भागो, नाङ्लो, डोका लगायतका परिकार राखिएको महिला उद्यम विकास समितिका अध्यक्ष अम्बिका श्रेष्ठले बताइन् ।
‘म्याग्दी भित्र्ने र मुस्ताङ जाने आउने मुख्य नाकामा स्थापना गरिएको कोशेली घरले स्थानीय उत्पादनको बजारीकरणका साथै जिल्लाको पहिचान बढाउन सहयोग पुग्ने अपेक्षा गरेका छौ,’ उनले भनिन् ‘गाउँका कृषक र उद्यमीले उत्पादन गरेका कृषि उपज र सामग्री खरिद गरि बिक्री गर्ने व्यवस्था मिलाएका छौ ।’
![Bhautik ministry notice about road](https://dhaulagirikhabar.com/wp-content/uploads/2023/10/Bhautik-ministry-notice-scaled.jpg)
![](https://dhaulagirikhabar.com/wp-content/uploads/2024/07/DSC00343-1024x576.jpg)
कोशेली घर रहेको भवनमा गत वैशाख महिनामा पर्यटकहरुलाई जिल्लाका धार्मिक, पर्यटकीय स्थलहरुको बारेमा जानकारी गराउने उद्देश्यले पर्यटक सूचना केन्द्र सञ्चालन भएको छ । सूचना केन्द्र र कोशेली घरले पर्यटन प्रर्वद्धनका साथै स्थानीय उत्पादनको बजारीकरणमा सहयोग पुग्ने म्याग्दी उद्योग वाणिज्य संघका अध्यक्ष सुविन श्रेष्ठले बताए ।
‘म्याग्दी भ्रमण वर्षको अवसरमा २०७५ मा स्थापना भएको सूचना केन्द्र कोरोना महामारी फैलिएपछि वि.स. २०७७ देखि बन्द भएको थियो,’ उनले भने ‘३ वर्षपछि गत वैशाखदेखि पुनःसञ्चालनमा ल्याइएको सूचना केन्द्रमा १ जना कर्मचारी र धार्मिक, पर्यटकीय स्थल, कला, संस्कृति सम्बन्धी जानकारी मुलक तस्विर तथा दृष्य सामग्री राखिएको छ ।’
म्याग्दीका ६ वटै स्थानीय तहका पर्यटकीय, धार्मिक स्थलका साथै जनजिवन, संस्कृति, रहनसहन झल्कने तस्विर, त्यसको महत्व, अवस्थिति, पुग्न लाग्ने समय र खान बस्नको सुविधा लगायत विषयमा जानकारीमुलक बोर्ड राखिएको छ । सूचना केन्द्र र कोशेली घर स्थापनाका लागि तत्कालीन जिविस र बेनी नगरपालिकाले २५ लाख रुपैयाँ बढी बजेट खर्चेर भवन बनाएका थिए ।
कोशेली घरको उद्घाटन गर्दै बेनी नगरपालिकाका प्रमुख सुरत केसीले बेनीमा पर्यटकको बसाई लम्बाउन, उद्यम व्यवसाय प्रर्वद्धन गर्न कोशेली घर र सूचना केन्द्र सहयोगी बन्ने विश्वास गरे । कालीपुल बसपार्कलाई ब्यवस्थित गरिएको र सडकलाई आक्सफाल्ट प्रबिधीको कालोपत्र गर्न बेनी–जोमसोम–कोरला सडक आयोजनाले ठेक्का आव्हान गरेको जानकारी दिए ।
बेनी नगरपालिकाका उपप्रमुख ज्योती लामिछानेले महिलाहरुलाई सिप सिकाउन र उद्यमशिलताको विकासका लागि आमा समूहसँग उपमेयर कार्यक्रम सञ्चालन गरेको बताइन् ।
![Gandaki dadelo notice](https://dhaulagirikhabar.com/wp-content/uploads/2023/05/Add-aantarik-mamila-upabhokta.jpg)