पोखरा, । पोखरामा शनिबार सम्पन्न गण्डकी प्रदेश स्तरीय बास्केटबल प्रतियोगिताको पुरुष तर्फको उपाधी म्याग्दीले जितेको छ ।
बास्केटबल संघ गण्डकी प्रदेशको आयोजनामा ३ दिनसम्म पोखरा रंगशालामा सञ्चालन भएको प्रतियोगिताको महिला तर्फ म्याग्दीको टिम उपबिजेता भएको छ ।
पुरुषतर्फ पर्वतलाई ६८ का विरुद्ध ८१ स्कोर गर्दै म्याग्दीले उपाधी जितेको हो । म्याग्दीले पुरुषतर्फको गत बर्षको पनि उपाधी जितेको थियो । महिलातर्फ बिजयी स्याङ्जाले ४५ र उपबिजेता म्याग्दीले ४५ स्कोर गरेका थिए ।
पुरुष र महिलामा बिजेता र उपबिजेतालाई ट्रफि, मेडल, प्रमाणपत्र सहित रु. ६० हजार र ४० हजार पुरस्कार प्रदान गरिएको छ । गण्डकी प्रदेशका स्वास्थ्य तथा सामाजिक विकास मन्त्री सिताकुमारी सुन्दासले पुरस्कार वितरण गर्नुभएको थियो ।
सुदिप कार्कीको नेतृत्वमा मैदानमा उत्रिएको म्याग्दीको पुरुष टोलीको प्रशिक्षक बिसन राना र व्यवस्थापक बास्केटबल संघ म्याग्दीका अध्यक्ष यमराज पुर्जा रहनुभएको थियो । लिसिम पुनको कप्टानीमा रहेको म्याग्दीका महिला टिमको प्रशिक्षक सुमन तिलिजा र व्यवस्थापक कोलिन पुन रहनुभएको थियो ।
म्याग्दीका बास्केटबल खेलाडीहरुले प्रदेश र राष्ट्रिय स्तरको प्रतियोगितामा उत्कृष्ट प्रर्दशन गरेर उपाधी दिलाएका छन् । तर बास्केटबल खेललाई जिल्लाका सरोकारवालाहरुले उपेक्षा गरेको खेलाडीले गुनासो गरेका छन् ।
