बेनी । नेपाल रेडक्रस सोसाइटी म्याग्दी शाखाले ट्राफिक प्रहरीलाई मास्क सहयोग गरेको छ ।
विश्व रेडक्रस दिवसको अवसरमा बुधबार बेनीमा आयोजित कार्यक्रममा जिल्ला ट्राफिक प्रहरी कार्यालयलाई २५ हजार थान मास्क उपलब्ध गराइएको हो ।
रेडक्रसका शाखा सभापति अमर बानियाले जिल्ला ट्राफिक प्रहरी प्रमुख राजकुमार केसीलाई मास्क हस्तान्तरण गर्नुभएको थियो ।
स्थापना दिवसको अवसरमा बेनीमा प्रभातफेरी गरिएको थियो । रेडक्रसको भवनबाट शुरु भएको ¥याली बेनी बजार परिक्रमा गरेर जिल्ला प्रशासन कार्यालय अगाडीको बिरेन्द्र चोकमा पुगेर समापन गरिएको थियो ।
शाखा सभापति बानियाले रेडक्रसले मानवीय सेवा र विपद् व्यवस्थापनका क्षेत्रमा गर्दै आएको कामलाई निरन्तरता दिने प्रतिवद्धता जनाउनुभयो । कार्यक्रमको सञ्चालन रेडक्रस म्याग्दी शाखाका कार्यालय प्रमुख धनञ्जय कुमार श्रेष्ठले गर्नुभएको थियो ।
सन् १८६३ मा विश्वमा रेडक्रस अभियानको सूत्रपात गर्ने रेडक्रस अभियानका संस्थापक जँ हेनरी ड्युनाको जन्मदिनको अवसर पारेर हरेक वर्ष आजकै दिन रेडक्रस दिवस मनाइन्छ । यस वर्षको विश्व रेडक्रस दिवसको नारा ‘मानवतालाई जीवित राखौँ’ भन्ने रहेको छ ।
अनिश्चित, ध्रुवीकृत, द्वन्द्व र विभेदको चपेटामा परेको संसारमा निःस्वार्थ सेवाभाव राखी मानवीय पीडा कम गर्न अहोरात्र खटिने स्वयंसेवकहरूले पु¥याउने सेवामार्फत मानवताको दियो जगाइराख्न आवश्यक छ’ भन्ने सन्देश दिन खोजेको छ । रेडक्रस अभियान विश्वको सबैभन्दा ठूलो मानवीय सञ्जाल भएको अन्तर्राष्ट्रिय परोपकारी संस्था हो ।
