सुरेन गुरुङ
शिख ः म्याग्दीको अन्नपूर्ण गाउँपालिका–५ मा रहेको शिख नमुना आवासीय माध्यमिक विद्यालयमा कम्प्युटर विज्ञान विषयको पठनपाठन सञ्चालनका लागि प्रवासीको सहयोगमा प्रयोगशाला स्थापना भएको छ ।
नयाँ शैक्षिक सत्रदेखि कक्षा ११ र १२ मा सञ्चालन गर्न लागिएको कम्प्युटर विज्ञान विषयको पठनपाठनका लागि शिख घर भई हाल बेलायतमा बसोबास गर्नुहुने दानबहादुर गर्बुजाको संयोजनमा जुटाइएको रु. १३ लाख सहयोगबाट कम्युटर प्रयोगशाला स्थापना गरिएको हो ।
प्रयोगशालाको अन्नपूर्ण गाउँपालिका–५ शिखका वडा अध्यक्ष राजेश तिलिजा पुन र जगबहादुर पुर्जाले मंगलबार उद्घाटन गर्नुभयो । विद्यालयका प्रअ केदार कार्कीले प्रवासीले सहयोग जुटाएर २० थान डेक्सटप कम्प्युटर सहयोग गरेका बताउनुभयो ।
“ग्रामिण क्षेत्रको विद्यालयमा प्रविधिमैत्री आधुनिक शिक्षा प्रदान गर्ने उद्देश्यले कम्प्युटर विज्ञान विषयको पठनपाठन सञ्चालनको तयारी गरेका छौ,” उहाँले भन्नुभयो “विदेशमा रहनुभएका विद्यालयका पुर्व विद्यार्थी, अभिभावक र शुभचिन्तकहरुले २० थान डेक्सटप कम्प्युटर खरिद गर्नका लागि रु. १३ लाख जुटाउनु भएको थियो ।”
घनश्याम तिलिजा, लालबहादुर पाईजाका परिवारले गते चैत १७ गते ४ थान कम्प्युटर विद्यालयलाई हस्तान्तरण गर्नुभएको थियो । पोखरा रहेका थप १६ थान कम्प्युटर ल्याएर जडान गरेपछि औपचारिक रुपमा उद्घाटन गरिएको हो ।
शिख उपल्लोस्वारा घर भई हाल बेलायत निवासी घनश्याम तिलिजाको परिवारबाट ३ थान डेक्सटप कम्प्युटरको लागि रु. १ लाख ९५ हजार, विद्यालयको अतिरिक्त क्रियाकलाप कोषलाई रु. २ लाख नगद सहित ४ थान भलिबल, बास्केटबल र १ थान नेट गरि कुल रु. २ लाख ३६ हजार सहयोग गर्नुभएको छ ।
शिख मुलपानी घर भई हाल बेल्जियम निवासी लालबहादुर पाईजाको परिवारबाट १ थान डेक्सटप कम्प्युटर र छात्रावासका लागि रु. दश हजार गरि रु. ९५ हजार सहयोग गर्नुभएको छ । विद्यालयका पुर्व शिक्षक बेलबहादुर तिलिजाले बुवा बिराज तिलिजा र आमा हरिकला तिलिजाको नाममा छात्रावासका विद्यार्थीको भोजन सामग्रीका लागि रु. २ लाखको अक्षयकोष स्थापना गरि नगद हस्तान्तरण गर्नुभएको थियो ।
हाल बेलायत निवासी स्वातका जगबहादुर पुर्जाले भोजनका लागि रु. ११ हजार सहयोग गर्नुभएको छ । विद्यालय व्यवस्थापन समितिका अध्यक्ष बागबिर पाईजाको अध्यक्षता र प्रअ केदार कार्कीको स्वागतमा सम्पन्न कार्यक्रमको सञ्चालन शिक्षक खेमराज पुनले गर्नुभएको थियो ।
कार्यक्रममा वडा अध्यक्ष राजेश तिलिजा, सहयोगदाता बेलबहादुर पुर्जा, जग बहादुर पुर्जाले मन्तब्य व्यक्त गर्नुभएको थियो । नयाँ भर्ना भएका १७ जना विद्यार्थीहरुलाई शैक्षिक सामग्री वितरण गरेर स्वागत गरिएको थियो ।
कक्षा १२ सम्मको पठनपाठन हुने विद्यालयले गण्डकी प्रदेश सरकारको सहयोगमा आवासीय (छात्रावास) सञ्चालन गरेको छ । हाल ३० जना विद्यार्थीले छात्रावासको सुविधा लिएका छन् । प्रदेश सरकारले प्रति विद्यार्थी दैनिक रु. ६५ का दरले आवासीय विद्यार्थीलाई सहयोग गर्छ । अपुग रकम दाताहरुको सहयोगमा जुटाइएको छ । विद्यालयमा १६० जना भन्दा बढी विद्यार्थीहरु छन् ।
