बेनी, । ‘गंगा जि का शिला अयोध्यायमा’ भजनको म्युजिक भिडियो सार्वजनिक भएको छ ।
भिडियोले भारतको अयोध्यामा निर्माण भएको राममन्दिर परिसरमा राखिएको देवशिला, गलेश्वर र कालीगण्डकी नदी सहित म्याग्दीका धार्मिक पर्यटकीय स्थलहरुको प्रचारप्रसार तथा प्रर्वद्धनमा सहयोग पुग्ने अपेक्षा गरिएको छ ।
धु्रब जिसी र माया गुरुङको स्वर रहेको गितको लय तथा संगित नकुल ढकाल (नविन)को रहेको छ । भुपेन बानियाले सम्पादन गर्नुभएको म्युजिक भिडियो म्याग्दीको गलेश्वरमा छायांकन गरिएको छ । म्याग्दीका कलाकारहरुले भजनमा अभिनय गर्नुभएको छ ।
अयोध्यामा करिब पाँच सय वर्षपछि पुननिर्माण भएको राममन्दिरमा हिन्दु धर्मावलम्बीहरुका भगवान रामको बाल्यकालको मुर्ति बनाउनका लागि गत वर्ष म्याग्दीको बेनी नगरपालिका–६ सेतिपहिरा स्थित कालिगण्डकी किनारबाट दुई वटा शिला लगिएको थियो ।
नेपाल सरकारको मन्त्रिपरिषद् बैठकको निर्णयअनुसार १८ र १६ मेट्रिक टन तौल भएका, सात फिट लम्बाइ, पाँच फिट चौडाइ र तीन दशमलव पाँच फिट मोटाइका दुईवटा शिला उपहार दिइएको हो ।
देवशिलाको उद्गम स्थललाई श्रीराम घाट नामाकरण गरिएको छ । देवशिला उत्खनन गरिएको ठाउँमा कालीगण्डकी नदीमा स्नान स्थल र स्तम्भ बनाउन लागिएको बेनी नगरपालिकाका प्रमुख सुरत केसीले बताउनुभयो ।
उहाँका अनुसार कालीगण्डकी नदीमा बसाह आकारको ढुङ्गालाई पनि संरक्षण गर्ने योजना सहित विस्तृत परियोजना प्रतिवेदन (डिपिआर) बनाएर स्रोतको खोजी थालिएको छ । देवशिला उत्खनन् भएको गलेश्वर क्षेत्रलाई हिन्दु तथा वौद्ध धर्मावलम्बीहरुको साझा तिर्थस्थल मुक्तिनाथको प्रवेशद्धार मानिन्छ ।
मुस्ताङको कागबेनीमा पितृ तर्पण गर्न जाने भक्तजन र तिर्थयात्रीलाई बेनीको कालीगण्डकीमा स्नान गर्ने व्यवस्था मिलाउन लागिएको हो । विश्वमै दुर्लभ र कालीगण्डकी नदीमा मात्र पाइने शालग्राम शिलालाई हिन्दु धर्मावलम्बीहरुले भगवान विष्णुको अवतार मान्ने गर्दछन् ।
कालीगण्डकी किनारको बेनी–गलेश्वर क्षेत्रमा ऋषिहरू पुलह, कपिल र जडभरतले तपस्या गरी सिद्धि प्राप्त गरेको पौराणिक मान्यता छ । हिन्दु धर्मगुरु हिमालय बाबाले पौलत्स्य र जडभरत ऋषिको तपस्या स्थल एवम् कालञ्जर पर्वतको फेदीमा रहेको देवशिला उद्गम स्थलको धार्मिक हिसाबले धेरै महत्व रहेको बताउनुभयो । कालीगण्डकीलाई हिन्दु धर्मावम्बीहरुले कृष्णगण्डकीको रुपमा चिन्ने गर्छन् ।
https://www.youtube.com/watch?v=3pNxzZpVALA
