पोखरा, – नेकपा माओवादी केन्द्रका उपमहासचिव एवं पूर्वअर्थमन्त्री वर्षमान पुन (अनन्त)ले मुलुकको नेतृत्व गर्छु भन्ने राजीतिक दल र नेतृत्वले जनतामा निराशा बाँड्न छाड्नुपर्ने बताउनुभएको छ ।
पोखरामा जारी नेपाल लिटरेचर फेस्टिभलको ११औं संस्करणको तेश्रो दिन शनिबार अर्थमन्त्री हुनुको अर्थ शीर्षक सेसनमा बोल्दै पुनले मुलुकमा केही हुँदैन भनेर निराशा फैलाउन खोजिएको बताउनुभयो ।
गत वर्ष मात्र नेपालको अर्थतन्त्र ऋलंकाको मोडलमा संकटमा जाने आधारहीन हल्ला चलाइएको भन्दै पुनले वर्तमान प्रचण्ड नेतृत्वको सरकार बन्दा ४ महिनाका लागि मात्र बस्तु र सेवाको आयात धान्न सक्ने वैदेशिक मुद्रा सञ्चिती रहेकामा हाल १२ महिनाका लागि आयात धान्न पुग्ने वैदेशिक मुद्राको सञ्चिती रहेको बताउनुभयो ।
‘विकासको गति पुगेको छैन । सरकारले गति बढाउनुपर्छ । तर, केही भएको छैन भन्ने सत्य होइन । निराशाको हल्ला खल्ला धेरै सही छैन,’ उहाले भन्नुभयो ‘तथ्यांक र आँकडामा हेर्नुपर्छ । एक वर्षअघि ४ महिनाका लागि विदेशी मुद्रा सञ्चिती थियो । अहिले १२ महिनाका लागि पुग्ने छ ।’
खोज पत्रकारिता केन्द्र (खोपके) का सम्पादक किरण नेपालले सहजीकरण गरेको सत्रमा पुनले सरकारले क्रिप्टो करेन्सी, विट क्वाइन र हुण्डी नियन्त्रण गरेका कारण अर्थतन्त्रमा सुधार देखिएको चर्चा गर्नुभयो । रेमिट्यान्स बढेका कारण वैदेशिक मुद्रा सञ्चिती बढेको भन्दै तर्क सही नभएको भन्दै उनले अघिल्ला वर्षहरुमा पनि रेमिट्यान्स आउने गरेको स्मरण गर्नुभयो । पुनले तथ्यांकलाई सही ढंगले भन्नुपर्नेमा आफू अनुकूल व्याख्या गर्ने प्रवृत्तिले जनतामा भ्रम परेको बताउनुभयो ।
देशभर १ लाख किमी सडक निर्माण भएको, विद्युत र सिमेन्ट निर्यात हुन थालेको, सामाजिक सुरक्षाको दायरा बढेको, महंगी नियन्त्रणमा आएको जस्ता सकारात्मक उपलब्धीको चर्चा नै नहुने गरेको बताउनुभयो । भारत र चीन ठूलो जनसंख्या भएका मुलुक छिमेकमै रहेको र लाखौं संख्यामा पर्यटक ल्याउन सकिने उहाँको भनाइ थियो । पोखरा क्षेत्रीय तर्राष्ट्रिय विमानस्थल पूर्ण क्षमतामा सञ्चालन गर्न सरकार लागिपरेको जानकारी उनले दिनुभयो ।
पुनले ठूला सहकारीले उत्पादन र वितरणको काम नगरी बैंकहरुले जसरी ऋण प्रवाह गरेका कारण हालको विचलन देखिएको उल्लेख गर्नुभयो । तीन खम्बे नीतिमध्ये सहकारी अर्थतन्त्रको मेरुदण्ड भए पनि बैंकहरुले गर्ने काम सहकारीले गर्दा विचलन देखिएको जनाउनुभयो । सहकारीको नियमन कमजोर भएका कारण अब ठूला बचत तथा ऋण सहकारीलाई राष्ट्र बैंकले नियमन गर्नुपर्ने उहाँको भनाइ थियो ।
सरकारी छानबिन समितिको प्रतिवेदनअनुसार सरकारले सहकारी नियमनका लागि राष्ट्र बैंकलाई आग्रह गरेको पुनले बताउनुभयो । विभिन्न सहकारीमा भएको ठगीबारे प्रहरीको केन्द्रीय अनुसन्धान ब्युरो (सिआईबी) सहित सरकारी निकायले छानबिन गरिरहेको भन्दै सहकारी ठगीमा संलग्नलाई सरकारले कारबाही गर्ने बताउनुभयो ।
पोखरामा शनिबारनै प्रेस सेन्टर नेपाल जिल्ला समिति कास्कीले आयोजना गरेको पत्रकार भेटघाटमा सरकार गठनपछि सुशासनको प्रयत्न भएको र राज्यका सबै अङ्गहरु सुशासन स्थापनामा केन्द्रित भएको यसबाट जनतामा आशा र उत्साह बढाएको उल्लेख गर्नुभयो ।
“नेतृत्वले पहल गर्दा जनतामा आशा जगाउन सकिन्छ, जनतालाई प्रोत्साहित गर्न सकिन्छ भन्ने सन्देश पैदा भएको छ,” नेता पुनले भन्नुभयो ‘वर्तमान सत्ता गठबन्धनमा कुनै समस्या छैन् । निर्वाचन प्रणालीले गठबन्धन अनिर्वाय गरेकाले राजनीतिक स्थायित्वका लागि गठबन्धन कायमै रहन्छ ।’
‘देशको स्थिरता र समृद्धिका लागि गठबन्धन गर्न सकिन्छ । निश्चित म्यान्डेट सहित अहिले काम गरेकाले अहिले गठबन्धन तलमाथि हुँदैन,” पुनले भन्नुभयो । नेकपा माओवादी केन्द्रको हालै सम्पन्न विधान अधिवेशनले वडा तहसम्म छलफल गरेर सुझाव सहित विधानमा परिमार्जन गरिएको बताउनुभयो । अव विधान अनुसार पार्टी सञ्चालनको वातावरण बनाएको नेता पुनले बताउनुभयो ।
