पिप्ले, । नेपाल विद्युत प्राधिकरणको ३८ औ वार्षिकोत्सवको अवसरमा सोमबार म्याग्दीको रघुगंगा गाउँपालिका–३ पिप्लेमा रहेको रघुगंगा हाइड्रोपावर लिमिटेडको कार्यालय परिसरमा वृक्षारोपण गरिएको छ ।
प्राधिकरणको सहायक कम्पनी रघुगंगा हाइड्रोपावर ४० मेगावाट क्षमताको राहुघाट जलविद्युत आयोजनाको प्रर्वद्धक हो । पिप्लेमा रहेको कम्पनीको कार्यालय र कर्मचारी आवास परिसरमा १८० वटा कल्कीफुल, गुल्मोहर, बिरेन्द्रफुल, धुपी र पारिजातका बिरुवा रोपिएको राहुघाट जलविद्युत आयोजनाका सहायक निर्देशक हरिकृष्ण बरालले जानकारी दिनुभयो ।
आयोजनाका व्यवस्थापक राज बिष्टको नेतृत्वमा कम्पनी र परामर्शदाता वाकफोसका कर्मचारीहरुले वृक्षारोपण गर्नुभएको थियो । डिभिजन वन कार्यालय म्याग्दीले निशूल्क बिरुवा उपलब्ध गराएको हो ।
नेपाल विद्युत प्राधिकरणले वृक्षारोपण गरेर स्थापना दिवस मनाउन देशभरका आफु मातहतका कार्यालय, कम्पनी र आयोजनाहरुलाई परिपत्र गरेको थियो । यसैगरी नेपाल विद्युत प्राधिकरण म्याग्दी वितरण केन्द्रका कर्मचारीहरुले पनि मिलनचोक सवस्टेशन परिसरमा स्थापना दिवसको अवसरमा सोमबार वृक्षारोपण गरेका छन् ।
