जोमसोम, । मुस्ताङ घुम्ने पर्यटकको संख्या ४५ प्रतिशतले बढेको छ ।
आर्थिक वर्ष २०७८÷०७९ को तुलनामा गत आर्थिक वर्ष २०७९÷०८० मा मुस्ताङमा ४५.७५ प्रतिशत बढी पर्यटक भ्रमणमा आएका अन्नपूर्ण संरक्षण क्षेत्र आयोजना (एक्याप)को इलाका संरक्षण कार्यालय जोमसोमले जनाएको छ ।
एक्याप जोमसोमका प्रमुख अशोक सुवेदीले आर्थिक वर्ष २०७९÷०८० मा कुल ७१ हजार ७०७ जना विदेशी पर्यटक मुस्ताङ भित्रिएका जानकारी दिनुभयो । “यो संख्या कोभिड अघि र पछिको पर्यटकीय तथ्यांकमा अहिलेसम्मकै उच्च वृद्धि हो,” उहाँले भन्नुभयो “आर्थिक वर्ष २०७८÷०७९ मा कुल ३८ हजार ८९६ जना विदेशी पर्यटक भित्रिएका थिए ।”
अघिल्लो आर्थिक वर्षको तुलनामा ३२ हजार ८११ जना बढी पर्यटक मुस्ताङ भ्रमणमा आएका हुन् । २०७९÷०८० मा सार्क देशका ५९ हजार ३१० जना र तेस्रो मुलुकका छ हजार ७४९ जना पर्यटकले मुस्ताङ भ्रमण गरेका हुन् । अघिल्लो वर्ष सार्क देशका ३६ हजार १५३ जना र तेस्रो देशका दुई हजार ७४३ जनाले मुस्ताङ जिल्लाको भ्रमण गरेका थिए ।
पाँच हजार ६४८ जना अन्नपूर्ण चक्रीय पदमार्गको थोराङ्ला झञ्याङ पारेर गरेर मनाङ हुदै मुस्ताङ आएका हुन् । थोराङ पास गरेर मुस्ताङ आएका ५६० जना सार्क मुलुक र पाँच हजार ८८ जना तेस्रो मुलुकका छन् ।
अघिल्लो वर्षको तुलनामा अन्नपूर्ण चक्रीय पदमार्ग भएर मुस्ताङ भित्र्ने पर्यटकको संख्या ८७ प्रतिशतले बढेको छ । आर्थिक वर्ष २०७८÷०७९ मा पाँच हजार ६४८ जना थिए । वैशाख महिनामा सबैभन्दा बढी १६ हजार १३७ र कम माघ महिनामा ६२० जना पर्यटक आएका थिए ।
अर्ध निषेधित क्षेत्रका रुपमा रहेको उपल्लो मुस्ताङमा तीन हजार ३८८ जना पर्यटकले भ्रमण गरेका छन् । गत वर्ष अनुकुल मौसम, विपद् नभएको, सडक यातायातको सहज पहुँच, होटल तथा लजको सुविधा हुन थालेपछि मुस्ताङमा पर्यटक आगमन बढेको एक्याप जोमसोमका प्रमुख सुवेदीले बताउनुभयो ।
उजाड पहाड, हिमाली हावापानी, संस्कृति र जिवनशैली, ताल, गुम्बा, मुक्तिनाथ मन्दिर, गुफाहरु मुस्ताङका आकर्षण हुन् । मुक्तिनाथ, जोमसोम, कागबेनी, लोमान्थाङ, मार्फा, ठिनी, धुम्बा ताल लगायत मुस्ताङका धार्मिक र पर्यटकीय स्थलमा पर्यटक आगमन पुरानै लयमा फर्किएको छ ।
