गलेश्वर, बेनी नगरपालिका ९ मा रहेको पवित्र धार्मिक एवम् तीर्थस्थल गलेश्वरमा स्नान गर्ने भक्तजनको घुइचो लागेको छ । साउन महिनाको पहिलो दिन सोमबार परेकाले बिहान ५ बजेदेखिनै गलेश्वरमा पुजाआजा गर्ने भक्तजनको भिड लागेको हो ।
कालीगण्डकी नदीको किनारमा नौ रोपनी क्षेत्रफलमा फैलिएको गलेश्वरमा हरेक वर्षको साउन महिनाको सोमबारका दिन मेला लाग्ने गर्छ । मंगलबारदेखि मलमास शुरु हुने, सोमबार संक्रान्ति र औषी परेकाले भक्तजनहरुको भिड लागेको गलेश्वर शिवालय क्षेत्र विकास कोषका अध्यक्ष माधवप्रसाद रेग्मीले बताउनुभयो ।
“साउन महिनाको सोमबार गलेश्वरमा दर्शन र पुजाआजा गरेमा पारिवारिक सुःख, सम्बृद्धि र चाहेको पुरा हुने धार्मिक मान्यता छ,” उहाँले भन्नुभयो “म्याग्दीका साथै पर्वत, बागलुङ, कास्कीका साथै भारतबाट पनि करिब बीस हजार जना भन्दा बढी भक्तजन आएका छन् ।”
गलेश्वर शिवालय मन्दिरको दर्शन र पुजाआजा, शिवलिङ्गमा बेलपत्र चढाउने र जल अर्पण गर्ने, कालीगण्डकी नदीमा स्नान गर्ने गरिन्छ । हिन्दु तथा बौद्ध धर्मावलम्बीहरुको साझा तिर्थ स्थल मुक्तिनाथको प्रवेशद्धार गलेश्वर पश्चिमको पशुपति नाथको रुपमा चिनिन्छ ।
यस वर्षको साउनको १, ८, १५, २२ र २९ गते सोमबार परेको छ । साउनको हरेक सोमबार निराहार व्रत बसी बिहान सबेरै स्नान गर्ने धार्मिक मान्यता छ । यस वर्ष साउनमा पाँच सोमबार परे पनि साउन २ गतेबाट मलमास सुरु हुँदैछ ।
गलेश्वर शिवालय क्षेत्र विकास कोषका सदस्य सचिब बलबहादुर खत्रीले साउन महिनामा लाग्ने मेला र पुजाआजालाई सुरक्षित र ब्यवस्थित रुपमा सम्पन्न गराउन स्थानीय प्रशासन, सुरक्षा निकाय, नगरपालिका, क्लब, आमा समूह लगायत सामाजिक र धार्मिक संघ संस्थासँग समन्वय गरेर उपसमिति बनाइएको बताउनुभयो ।
