बेनी । म्याग्दीको बेनी अस्पतालको सामाजिक परिक्षण प्रतिवेदन आइतबार सार्वजनिक भएको छ ।
बेनी अस्पतालले आयोजना गरेको कार्यक्रममा सामाजिक परिक्षण गर्ने जिम्मेवारी पाएको गैरसरकारी संस्था कदम म्याग्दीका कार्यकारी निर्देशक मुक्ति ढुङ्गानाले प्रतिवेदन प्रस्तुत गर्नुभएको थियो ।
अस्पतालको आर्थिक वर्ष २०७८÷७९ को प्रतिवेदनलाई आधार मानेर सेवाग्राहीसँग छलफल र अन्तरक्रिया गरेर प्रतिवेदन तयार पारिएको ढुंगानाले बताउनुभयो । अस्पतालको गुनासो सुनुवाईका लागि राखिएको पेटिका नियमित खोलेर मुचुल्का बनाउने र त्यसको सम्बोधनमा ध्यान दिने, दरबन्दी अनुसार जनशक्तिको पदपुर्तिका लागि पहल गर्नुपर्ने र भौतिक संरक्षण निर्माणलाई पूर्णता दिनुपर्ने प्रतिवेदनमा उल्लेख छ ।
फोहोर व्यवस्थापनमा ध्यान दिनुपर्ने प्रतिक्रिया दिएका सेवाग्राहीहरुले पालो पर्खने ठाउँका कर्मचारीले आफन्तलाई अगाडी सेवा पाउने अवसर दिने गरेको, स्वास्थ्य विमा गरेका बिरामीलाई वेवास्ता गरेको गुनासो गरेका प्रतिवेदनले जनाएको छ । बिरामीलाई स्वास्थ्यकर्मीले गर्ने व्यवहार सन्तोषजनक रहेको प्रतिवेदनमा जनाइएको छ ।
अस्पताललाई पलास्टिकजन्य फोहोरबाट मुक्त बनाउनुपर्ने र लासघर परिसरमा टहरा बनाउनुपर्ने सेवाग्राहीहरुको भनाई थियो । प्रतिवेदनमा छलफल गर्दै गैरसरकारी संस्था महासंघ म्याग्दीका अध्यक्ष दिपक पौडेलले अस्पतालमा दुर्गमबाट आउने सेवाग्राहीले छिटो सेवा पाउने व्यवस्था मिलाउनुपर्ने बताउनुभयो ।
बेनी नगरपालिकाका–८ का वडा अध्यक्ष उत्तम कर्माचार्यले निर्माणाधिन ५० शैया क्षमताको भवनलाई पूर्णता दिन ताकेता गरिरहेको बताउदै अस्पतालले बिरामीलाई उपलब्ध गराउन आपुर्तिकर्ताबाट खरिद गर्ने औषधीको गुणस्तर परिक्षणको आवश्यकता औल्याउनुभयो ।
जिल्ला समन्वय समिति म्याग्दीका प्रमुख राजकुमार थापाले सम्भव हुने सुधारका काम गर्न अस्पताल व्यवस्थापन समितिले सक्रियता देखाउन र बेनी नगरपालिका लगायत स्थानीय तहहरुले सघाउनुपर्ने बताउनुभयो ।
अस्पतालमा दरबन्दी अनुसारको जनशक्ति व्यवस्थापनका लागि प्रदेश सरकारसँग समन्वय गर्ने जिसस प्रमुख थापाले बताउनुभयो । अस्पतालको भवन निर्माणलाई पूर्णता दिन चौतर्फी दवाव सिर्जना गराउनुपर्ने उहाँको भनाई थियो ।
बेनी अस्पताल व्यवस्थापन समितिका अध्यक्ष ज्ञानेन्द्र सुवेदी र निमित्त प्रमुख डाक्टर अञ्जु थापाले सुभावका आधारमा अस्पतालको सेवा प्रवाहमा सुधार ल्याउने प्रतिवद्धता जनाउनुभयो । कार्यक्रमको सञ्चालन कदम म्याग्दीका अध्यक्ष हरिप्रसाद पौडेलले गर्नुभएको थियो ।
