बेनी,। म्याग्दीको बेनी नगरपालिकाले जग्गाको बर्गीकरण गरेको छ ।
आगामी आर्थिक वर्षदेखि नगरपालिका भित्रको जग्गाको कित्ताकाट खुलाउने तयारी र लक्ष्यका साथ वर्गीकरण गरेको हो । असार १० गते भएको १३ औ नगरसभाले भू–उपयोग वर्गीकरण सम्बन्धी विषयको प्रतिवेदन पारित गरेको थियो ।
सभाको निर्णय र प्रतिवेदन यही असार महिनाभित्र भूमि व्यवस्था मन्त्रालयबाट स्विकृत गराएर साउन १ गतेदेखि कित्ताकाट खुलाउने तयारी गरेको बेनी नगरपालिकाका प्रमुख सुरत केसीले बताउनुभयो ।
एक वर्षदेखि जग्गाको कित्ताकाट नखुल्दा घरजग्गाको कारोबार र अंशबण्डा रोकिएको छ । मालपोत कार्यालयले संकलन गर्ने राजस्वमा गिरावट आएको छ । म्याग्दीका अन्य पालिकाहरुले जग्गाको वर्गिकरण गरेका छैनन् । बेनी नगरपालिकाले जिल्लामै पहिलो पटक जग्गाको बर्गीकरण गरेको हो ।
“जग्गाको कित्ता काट रोकिएका कारण नगरवासीलाई निक्कै समस्या भएको छ । आगामी आर्थिवर्षदेखि कित्ता काट सुरुभएपछि वित्तीय संस्था र व्यक्तिलाई जग्गा किनबेचमा सहज हुने छ,”नगर प्रमुख केसीले भन्नुभयो “ जग्गाको कित्ताकाट शुरु भएपछि जग्गाको विक्री वितरण बढेसँगै नगरका राजश्व असुलीमा वृद्धि हुने छ ।”
नेपाल सरकारको मापदण्ड अनुसार भू–उपयोग नीति अनुसार बेनीमा आवासीय, कृषि, औद्योगिक, व्यावसायिक, खानी तथा खनिज क्षेत्र, वन, नदी, खोला, ताल सिमसार, सार्वजनिक उपभोग, सांस्कृतिक तथा पुरातात्विक महत्व र अन्य क्षेत्रमा जग्गालाई बर्गीकरण गरिएको छ ।
नगरपालिकाले आगामी आर्थिक वर्षमा रु. ४ करोड ५४ लाख आन्तरिक राजश्व संकलन गर्ने लक्ष्य राखेको छ । चालु आर्थिक वर्षको ११ महिनामा रु. चार करोड २६ लाख ७२ हजार १४० आन्तरिक राजस्व संकलन गरेको छ ।
जग्गाको कित्ता काट सुरु भएमा राजश्व समेत बढ्ने बेनी नगरपालिकाका प्रमुख प्रशासकीय अधिकृत धोलकराज ढकालले बताउनुभयो । नगरसभाले संस्था दर्ता तथा नविकरण गर्ने सम्बन्धी कानुन पारित गरेको छ ।
रु. ७० करोड ८९ लाख को बजेट पारित गरेको बेनी नगरपालिकाले शिक्षा, स्वास्थ्य, सडक, पूर्वाधार, कृषि, खेलकुद र पर्यटन क्षेत्रलाई प्राथमिकता दिएको कार्यपालिकाका प्रवत्ता रमेशकुमार श्रेष्ठले बताउनुभयो ।
शिक्षा स्वास्थ्य क्षेत्रमा अपेक्षित सुधार ल्याउन मेयरसँग सामाजिक, घरघरमा स्वास्थ्यकर्मी, हामी सक्छौ हामी गर्छौ, विपद्मा मेयर, आयआर्जन सुधार र सिप विकासका लागि उपमेयरसँग आमा समूह जस्ता नमुना कार्यक्रम सञ्चालन गर्ने प्रवत्ता श्रेष्ठले बताउनुभयो ।
